Callón e Jorquera estrean vídeos lanzados por NÓS-Candidatura Galega para as redes sociais

“Para divers@s NÓS” é o primeiro dunha serie de nove vídeos de precampaña que NÓS-Candidatura Galega difunde desde hoxe nas redes sociais, nos que se recorre a un estilo desenfadado e ao humor para explicar propostas do programa ou valores que defende esta candidatura de cara as eleccións xerais do 20D.

O primeiro das curtas ten como protagonistas ao cabeza de lista pola Coruña, Carlos Callón, e a Francisco Jorquera, portavoz parlamentario do BNG, -forza política integrada na candidatura de NÓS-, e pretende visualizar a defensa da diversidade e o respecto a todas as opcións sexuais cun bico entre ambos protagonistas. http://noscandidaturagalega.gal/portfolio-tag/diversidade/

Trátase do primeiro dunha serie de 9 vídeos que se emitirán, un cada día, ata o comezo da campaña o 4 de decembro baixo o título xenérico de #ParaVideosNós, que estarán dispoñibles nas redes sociais de NÓS-Candidatura Galega,: https://www.facebook.com/noscgalega, Twitter: @noscgalega, YouTube: https://www.youtube.com/watch?v=-J1MAbG7fy e na web, http://noscandidaturagalega.gal/.

Todos os vídeos xogan coa sorpresa, co humor e ca parodia para introducir os valores e ideas que representa NÓS-Candidatura Galega, e forman parte dos materiais de precampaña e campaña que están concibidos e executados por artistas galeg@s, co que se busca tamén poñer en primeiro plano a creatividade dos artistas do país, un dos valores que reivindica a candidatura.

Ademais de vídeos, e ata o 20D, empregaranse temas musicais orixinais compostos por artistas que colaboran con Nós-Candidatura Galega, viñetas de opinión e fotografía de autor, que se irán difundido progresivamente ata o día das eleccións xerais.