Medio centenar de especialistas debaten sobre a diáspora europea no CCG

É a primeira vez que Galicia se converte en sede dunha conferencia anual que reunirá a máis de cincuenta especialistas de todo o mundo para abordaren cuestións relativas á diáspora migratoria europea e á identidade cultural. O congreso contará con representantes de museos migratorios de Alemaña, Croacia, Inglaterra, Finlandia ou Francia, entre outros. Haberá un total de 35 comunicacións repartidas en sete sesións que analizarán as novas emigracións en Europa; novas migracións globais; diásporas; identidade e relixión, patróns de comportamento colectivo; transculturalismo e hibridación; museos de emigración e, finalmente, unha sesión dedicada á actual crise europea na emigración, con especial atención á crise dos refuxiados.