A Biblioteca Pública de Lugo acolle a mostra 'Manuel María. Beleza, amor e compromiso'

A Biblioteca Pública de Lugo acolle ata o 31 de outubro a mostra itinerante ‘Manuel María (1929-2004). Beleza, amor e compromiso’, no marco da programación conmemorativa das Letras Galegas 2016. A vida e a obra do poeta de Outeiro de Rei chega á cidade da muralla con este proxecto expositivo promovido pola Consellería de Cultura e Educación –a través das secretarías xerais de Cultura e de Política Lingüística– e mais pola Casa-Museo Manuel María, que desde o pasado mes de maio está a percorrer as catro provincias galegas co fin de lle achegar á cidadanía a figura do escritor.

Dun xeito ameno e gráfico, a exposición aborda a personalidade do autor e a evolución da súa obra ao longo das distintas etapas vitais. Faino a través de 10 paneis –elaborados a partir do material achegado pola propia Fundación Manuel María de Estudos Galegos–, que se complementan cun folleto informativo sobre a figura, a vida e a obra do escritor.

A identificación do poeta coa terra e a paisaxe, o seu compromiso coa lingua galega, a súa faceta de clásico e precursor da vizosa literatura infantil galega da que hoxe gozamos, a súa participación na vida política, a súa poesía intimista ou a variedade de xéneros literarios son algúns dos aspectos nos que afonda a mostra.
Próxima parada, Ferrol

Logo do seu paso polos municipios da Coruña, de Outeiro de Rei, de Vilalba, de Santiago de Compostela, de Marín, de Noia, de Pontevedra, de Vigo e de Monforte de Lemos, a mostra proseguirá o percorrido pola Rede de Bibliotecas Públicas de Galicia, concretamente na Biblioteca Pública de Ferrol, onde se poderá visitar do 3 ao 15 de novembro. A última parada será no Ateneo de Ourense, do 17 ao 30 de novembro.

Máis información, datas da itinerancia e materiais na Axenda de Cultura de Galicia, en www.cultura.gal/axenda, e no Portal da Lingua Galega, no enlace web http://www.lingua.gal/recursos/todos?content=/Portal-Lingua/Contido/recursos/letras-galegas/2016/contido_0556.html.