A Coruña recibe a certificación por ser, xunto con Pontevedra, o Concello máis transparente de Galicia

O Concello da Coruña vén de recibir a certificación como o máis transparente de Galicia, nun posto compartido co ente municipal de Pontevedra, unha distinción que outorgan a plataforma Dyntra -entidade para a transparencia e a rendición de contas das institucións- e a asociación Transparencia Pública, en función do índice DAM, que outorga a ambos concellos un nivel de transparencia do 67%. O alcalde, Xulio Ferreiro, recibiu esta certificación, no curso dunha xornada sobre transparencia pública na comunidade autónoma de Galicia celebrada en Santiago, na que participou como parte da mesa de debate sobre transparencia municipal.

Durante a súa intervención, o rexedor coruñés deu conta dalgunhas das medidas impulsadas polo Goberno local para abrir o coñecemento da xestión municipal á cidadanía e de cara ao rendemento de contas, que van -sinalou- desde a inclusión de membros dos grupos da oposición na Xunta de Goberno local e na mesa de contratación, á retransmisión en directo dos plenos ou á recente posta en marcha dun portal web transparencia do Concello, no que a cidadanía pode acceder de forma sinxela á información relacionada coa acción de goberno e a xestión da institución local. "A transparencia forma parte dunha nova cultura política, na que o Goberno coruñés seguir afondando como antídoto ao escurantismo, xa que, ademais, forma parte do dereito da veciñanza de estar informada da acción do seu Goberno e a súa Corporación Municipal", salientou Ferreiro.