Skip to main content
A | B | C | D | E | F | G | I | L | M | N | O | P | Q | R | S | T | V | X | Z

En Marea cualifica os orzamentos de 2018 de restrititivos, antisociais e decepcionantes

Na rolda de prensa conxunta entre os deputados de En Marea pola provincia de Ourense e Ourense en Común, a concelleira Ledicia Piñeiro lembrou que viven na única cidade galega cos orzamentos prorrogados dende 2014, “polo que os únicos orzamentos que podemos ter de referencia son os da Xunta para a cidade”. Tamén considerou insuficientes os 300 mil euros que destina a Xunta en 2018 para a construción do CAPD, “unha reivindicación cidadá histórica pero tamén unha promesa electoral do PP para gañar as eleccións á Xunta”.

O centro de saúde do Vinteún e a Casa de Acollida para Mulleres foron outras das reivindicacións de Ourense en Común, que lle pediu ao Concello e á Xunta “que deixen de pasarse a pelota”. “É inaceptable que esta cidade non con conte con esta infraestrutura, unha necesidade de primeira magnitude para mulleres que sofren situacións de violencia ou que son vítimas de trata”.

A deputada Ánxeles Cuña, que defendeu o traballo interinstitucional entre os representantes locais e autonómicos, denunciou que se a Xunta cualifica estes orzamentos de expansivos, “para Ourense son restritivos, antisociais e decepcionantes”. E defendeu esta tese con “datos obxectivos”, pois Ourense é a provincia que menos investimento recibe en capítulos fundamentais coma o SERGAS (só o 5% do total de Galicia), xustiza (8%), o Instituto Galego de Vivenda e Solo (8%) ou a Axencia Galega de Infraestruturas (16%). Noutras áreas fundamentais coma Educación, só recibe o 14% do investimento global.

Ademais, Cuña lembrou que os orzamentos da Xunta se esquecen totalmente do emprego nunha provincia que acapara máis da metade do paro de toda Galicia e onde moitas economías familiares viven dos pensionistas, que tamén se atopan entre os que perceben as pensións máis baixas de todo o Estado.

Pola súa banda, Davide Rodríguez destacou que Ourense é a cidade que menos investimento real leva de todo o país, 13 millóns de euros “fronte aos 80 que leva Vigo” e apuntou que 5M€ van para o enlace de San Cibrao das Viñas coa A52, “que leva orzado máis de cinco anos sen executar e que conta coa oposición dunha plataforma cidadá e mesmo do sector dos transportistas”.

E, segundo Rodríguez, o Goberno de Feijóo volve esquecerse da que debería ser a súa principal preocupación na provincia de Ourense, a fixación de poboación”. “Non hai medidas para frear o despoboamento rural, con estas contas seguiremos pechando escolas e veremos reducida aínda máis a calidade da nosa sanidade e mobilidade”, denunciou, “ademais de non verse beneficiada malia ser a provincia cos máis graves problemas medioambientais e ecolóxicos”.
Gabinete de Comunicación de En Marea