Celébranse os Días Europeos da Artesanía coa posta en valor dos oficios

A Consellería de Economía, Emprego e Industria participa desde ata o domingo 8 de abril na celebración dos Días Europeos da Artesanía con diferentes actividades de promoción dos oficios galegos. Trátase dunha iniciativa promovida en España pola Fundación Española para la Innovación de la Artesanía (Fundesarte) e na que a Xunta colabora por sétimo ano consecutivo cunha serie de eventos de divulgación e posta en valor dos oficios artesáns.

No marco desta programación, a directora xeral de Comercio e Consumo, Sol Vázquez Abeal, visitou esta mañá o curso Iniciación á creación de pezas básicas de sombreirería artesanal, que se celebra en Ourense, ademais desta fin de semana, os días 13, 14 e 15 de abril, de 10,00 a 14,00 horas e de 15,00 a 19,00 horas. Esta actividade, organizada pola Xunta, en colaboración coa Asociación de Artesáns de Ourense (Adao), está dirixida polo sombreireiro ourensán Félix de Martín, e inaugura o programa de formación especializada para artesáns para este ano 2018 impulsado pola Xunta, a través da Fundación Pública Artesanía de Galicia, no que se incluirán actividades noutras localidades galegas.

O obxectivo desta acción formativa é poñer en contacto aos asistentes con técnicas básicas de sombreirería para que, dunha maneira sinxela e sen necesidade de ferramentas específicas, comecen a realizar pezas de sombreirería cun alto compoñente estético e/ou práctico. Segundo explicou a directora xeral, recibirán as bases para poder investigar e evolucionar cara a técnicas máis complexas de maneira sinxela.

Vázquez Abeal, ademais, explicou que a colaboración e a formación entre os profesionais da artesanía é unha das áreas de traballo que a Xunta de Galicia desexa impulsar, co fin de conservar o coñecemento dos artesáns tradicionais e de promover a incorporación de novos talentos ao sector artesanal galego, consolidándoo coma un sector de prestixio, competitivo e transversal.

A celebración dos Días Europeos da Artesanía está inspirado nas Journées des métiers d’art, desenvolvidas en Francia desde 2002. A convocatoria pretende obter unha participación cada vez máis ampla de países da Unión Europea. Este ano, un total de dezaseis países tomarán parte celebración: Alemaña, Austria, Bélxica, Bulgaria, Francia, Hungría, Grecia, Irlanda, Italia, Letonia, Lituania, Reino Unido, Suíza, Polonia, Portugal e España. Toda a información, horarios e localización destas actividades poden ser consultadas na páxina web www.diasdelaartesania.es

Tamén enmarcado nas actividades previstas nos Días Europeos da Artesanía celébranse os Oficios en acción, a proposta da Asociación Galega de Artesáns para celebrar cada ano estes días e coa que colabora a Fundación Pública Artesanía de Galicia. Este ano cambia a súa ubicación habitual na Coruña e móvese a Santiago de Compostela, onde se realizará unha escultura con vimbio na que poderán participar de xeito espontáneo todos aqueles que se decidan achegarse ata o claustro do Museo do Pobo Galego (San Domingos de Bonaval, s/n). O taller estará dirixido por dúas experimentadas cesteiras Idoia Cuesta e Julia de la Cal e terá lugar o sábado de 10,30 a 19,30 horas; e o domingo de 11,00 a 14,00 horas.

O CEE Manuel López Navalón de Santiago de Compostela (Casas do Rego, 20) organiza, ademais, as xornadas Artesanías no Navalón, que hoxe rematan e que tiveron como obxectivo dar a coñecer diferentes oficios artesáns que se desenvolven na cidade.

Nesta fin de semana, ademais, ofrécense diferentes propostas de demostracións abertas de oficios artesáns en Vimianzo, Vigo, Pontevedra, Gondomar e Cervo. O castelo medieval de Vimianzo tamén ten previsto demostracións en vivo dos oficios que se amosan habitualmente neste espazo como a Olería de Buño, o encaixe da Asociación de Palilleiras As Nemanquiñas, a cestería, o tecido tradicional do obradoiro Liño de Galicia, ademais da exposición Unha xanela á beleza, do obradoiro de Esther Ferreiro, na que se conxuga a prata, o vidro de Murano e a madeira. O Castelo de Vimianzo (Rúa Fonte dos Cabalos, 22) estará aberto desde hoxe e ata o domingo en horario de 10,30 a 19,00 horas.

En Pontevedra, o obradoiro Estilo Aramar abrirá as súas portas mañá e ata o domingo contará con demostracións sobre flores de tea, pel, papel, porcelana, cerámica, ecoprint en téxtil e cerámica, así coma de estampación de tecidos. Nas actividades participarán as artesás Viviana Araujo Martinez, Marivi Santos, Mar Barral, María Jesús Louzao e Azu Vilas. As actuacións desenvolveranse na aula formativa de Estilo Aramar en horario de 11,00 a 14,00 horas e de 16,30 a 20,00 horas.

Vigo tamén se suma aos actos de celebración dos Días Europeos da Artesanía coa celebración dunha xornada de portas abertas con demostracións de diferentes oficios artesanais: a construción da gaita e da zanfona, a serigrafía artística, a ourivería, o coiro, o encaixe, a talla en madeira, a confección, o debuxo, a pintura e a cerámica artística.

Cervo celebrará a 15ª edición do Encontro de Palilleiras, que terá lugar no Pavillón Municipal dos Deportes de San Cibrao (Avda. da Veiga, s/n), en horario de 10,30 a 17,30 horas.

En Gondomar, os ceramistas Roberto Piñeiro e Antón Román trasladan os seus talleres á rúa para a celebración desta fin de semana. Nas dependencias do antigo matadeiro de Gondomar (Rúa Rosalía de Castro), os artesáns achegaranlle o oficio a todos os visitantes. Haberá exposición de olería tradicional e de cerámica contemporánea, ademais de demostracións en vivo. A actividade celebrarase o sábado 7 e o domingo 8 en horario de 11:00 a 20:30 horas.

Por outro lado, un total de oito obradoiros artesáns abrirán as súas portas durante esta fin de semana para sumarse aos Días Europeos da Artesanía. En Buño (Malpica de Bergantiños), o obradoiro Alfarería Aparicio repite a experiencia dos últimos anos e ofrécelle aos visitantes unha oportunidade única para coñecer de primeira man a olería de Buño. O venres e o sábado o horario será de 10,00 a 21,00 horas e o domingo de 10,00 a 14,00 horas.

En canto ao encaixe, a artesá Lucía Figueroa, do obradoiro Encajes Lucita, ten preparada unha actividade de iniciación ao mundo do encaixe, que se celebrará entre mañá e o domingo no seu espazo do Ézaro (Dumbría), en horario de 11,00 a 20,00 horas.

En Santiago de Compostela, a ourive Susi Gesto abre o seu obradoiro hoxe e mañá en horario de 11,00 a 20,00 horas. Mañá a artesá impartirá un taller de ourivería compostelá en dúas quendas de mañá e de tarde, no que se dedicará especial atención á filigrana e ao traballo co acibeche.

O artesán Manuel Campos Vilaverde recibirá visitantes durante os tres días no seu obradoiro de Arca (A Estrada), onde dará a coñecer o seu traballo co mármore, coa pedra e coa escaiola. O horario de visitas, con cita previa, é hoxe de 11,00 a 17,00 horas; mañá de 11,00 a 14,00 horas; e o domingo de 11,30 a 15,00 horas.

A ceramista Laura Villanueva Piñeiro, do obradoiro Alén Das Olas Cerámica (Marín), abre tamén o seu espazo de traballo esta fin de semana, previa cita. O horario de visitas é de 17,00 a 20,00 horas, o venres; de 11,00 a 14,00 horas, mañá; e de 17,00 a 19,00horas, o domingo.

En Ourense, a artesá Paz Carro, do taller Carro Artesanos, dará a coñecer a elaboración das súas maquetas e das súas escenografías belenísticas. As visitas serán mañá de 11,00 a 19,00 horas, previa cita. En Allariz, o obradoiro de tecido artesán Inés Rir & Co. Diseño Textil (Allariz) abrirá as súas portas hoxe e mañá. As visitas, con cita previa, realizaranse en horario de 10,00 a 13,00 horas e de 16,30 a 19,00 horas.

Por último, o obradoiro de cerámica Regal (Viveiro) ofrece tamén xornadas de portas abertas hoxe e mañá, nas que haberá talleres e demostracións en vivo. As actividades terán lugar no Complexo Cultural Regal Xunqueira, en Viveiro, en horario de 10,00 a 14,00 horas e de 16,00 a 19,00 horas.