O festival de artes escénicas USCénica 2021 estenderase do 22 de xuño ao 10 de xullo

Concertos, representacións teatrais, ou encontros con persoeiros do eido da cultura nutren o programa de USCénica 2021.

“En tempos complexos coma os que vivimos, poucos elementos teñen tanta capacidade de contribuír á dinamización e reforzo das relacións sociais e persoais como a cultura”, apuntan dende a organización de USCénica. Por iso a USC, nesta chamada nova normalidade, “reforza a súa aposta por aquilo que nos une e nos inspira, por todas e cada unha das súas formas. É a cultura USC”.

Os espazos de exhibición deste USCénica 2021 serán a Sala de teatro Roberto Vidal Bolaño e Terraza do Auditorio da Universidade (Avenida de Vigo, s/n. Campus Vida), o Teatro Principal (Rúa Nova, 21), o Salón Teatro (Rúa Nova, 34), e a Igrexa da Universidade (Praza de Mazarelos, 2). O programa completo do festival, así como as localizacións específicas pode consultarse nesta ligazón. As entradas só poderán retirarse o mesmo día da función nos espazos onde se programa cada espectáculo a partir das 19.00 horas.

Fins solidarios

O acceso é de balde aos concertos, encontros e proxeccións, previo paso polo despacho de entradas podendo obterse un máximo de dúas por persoa. O acceso ás funcións programadas na sala de teatro Roberto Vidal Bolaño, Teatro Principal, Salón Teatro e Igrexa da Universidade teñen un prezo de 3 euros, e a recadación será destinada ao Banco de Alimentos de Santiago e Compostela.

Medidas sanitarias

Por mor da crise sanitaria da COVID-19, todas as actuacións rexeranse polos protocolos ditados polas autoridades sanitarias. Neste senso, as persoas que asistan ás funcións programadas na sala de teatro Roberto Vidal Bolaño están obrigadas a facer uso do xel sanitizante situado no acceso da sala antes de entrar na mesma. Igualmente, deberán retirar a súa máscara facial persoal e colocar outra que lles será entregada gratuitamente pola organización do festival. A capacidade desta sala é dun máximo de 18 espectadores por pase. Unha vez comezada a función non se permitirá o acceso a ningún dos espazos.

Oferta formativa

No marco do festival tamén se desenvolverán diferentes accións formativas nos eidos da dirección de escena, iluminación, escrita teatral e performance.