Voces expatriadas en chinés e galego abren as citas invernais de Poetas Di(n)versos

Nesta ocasión as voces convocadas exprésanse en galego e en chinés. Yang Lian e Xavier Queipo son poetas que naceron en lugares ben distintos dos países nos que viviron a meirande parte da súa vida, para rematar por residir noutro espazo distinto. Esa condición expatriada acabou por colarse nunhas miradas ben persoais e dotadas dunha longa bagaxe literaria. Se o primeiro naceu en Suíza, criouse de volta na China e é hoxe cidadán británico, o segundo naceu en Compostela, viviu moitos anos en Bruxelas e reside hoxe en Vigo. Xavier Queipo é tamén tradutor e un reputado narrador, mentres que o internacionalmente multipremiado Yang Lian está considerado unha das voces máis representativas da literatura chinesa.

O acto, aberto e gratuíto para todas as persoas interesadas, aínda que cumprindo estritamente todas as normativas sanitarias, terá lugar ás 20h e unha libraría de proximidade poñerá á venda os títulos dos autores/as convidados. A directora deste ciclo que foi Premio da Crítica de Galicia á Mellor Iniciativa Cultural en 2014 conducirá un evento no que lerá as traducións ao galego dos poemas de Yang Lian, preparadas expresamente para a ocasión.