A Orquestra da USC culmina o seu Programa de Verán 2023 con dous concertos en Compostela e Poio

Ese día, a formación ofrecerá ademais un ensaio aberto ás 12.30 horas no mesmo lugar para que o público poida descubrir de primeira man o traballo da OUSC e os pormenores da preparación dun concerto.

O seguinte será no porto de Raxó, en Poio, o luns 7 de agosto ás 20.30 horas. Tamén neste caso, con entrada gratuíta.

O profesor Iago Lariño dirixirá a orquestra en ambas as ocasións nun programa que arrincará coa 'Obertura' do Carnaval Romano de Héctor Berlioz, para seguir co Concerto para contrabaixo e orquestra nº2 de Giovanni Botessini que terá a Dina Durán, integrante durante o presente curso da OUSC, como solista. Continuará coa interpretación das catro primeiras Danzas Eslavas de Antonín Dvořák e rematará co 'Intermedio' da Voda de Luis Alonso, afamada partitura do xénero da zarzuela.

Na interpretación das pezas, o estudantado do Programa contará nesta ocasión co acompañamento de persoal docente. Así, poderemos escoitar a Xavier Fernández e Rosa Pampillo, aos violíns, a Blanca Bello, na viola, a Clara Martínez, no violonchelo, e a Iago Lariño na sección de ventos.

A OUSC

A Orquestra da Universidade de Santiago de Compostela ten como obxectivo impulsar entre a mocidade universitaria e, por extensión na cidadanía, un proxecto educativo e cultural coa música como eixe central.

Ao abeiro da Área de Cultura da Vicerreitoría de Estudantes e Cultura, e baixo a dirección de Mario Diz, a OUSC procura ampliar a formación musical dun estudantado que, semana tras semana, adquire un maior compromiso co estudo e a difusión dos valores da música.