A Axencia Galega de Infraestruturas recibe a encomenda da execución das obras da estación intermodal de Lugo

As empresas interesadas neste contrato teñen ata o 10 de xaneiro para presentar as súas ofertas para levar a cabo as obras, que teñen un prazo de 25 meses.

A través desta encomenda, o departamento de Infraestruturas da Xunta asume a participación na contratación e adxudicación das obras, así como a súa dirección e execución.

A Xunta construirá estas actuacións da estación intermodal de Lugo, como gran centro de transporte público no que sexa posible pasar do autobús ao tren en apenas 2 minutos, desde unhas instalacións modernas e accesibles, dotadas, ademais, dun grande aparcadoiro subterráneo.

Para iso, executará unha nova terminal de autobuses integrada na estación de ferrocarril, que a Xunta financia integramente, achegando 8,5 M€. A nova estación de autobuses intermodal contará cun total de 23 dársenas -18 para viaxes e 5 de regulación- e un edificio de servizos aos usuarios á mesma cota, preparada para albergar uns 620.000 viaxeiros cada ano.

A Xunta asume, tamén, o compromiso de construír un aparcadoiro subterráneo con 240 prazas, 8 delas para persoas con mobilidade reducida, que responden a unha necesidade da estación de ferrocarril e da propia cidade. O aparcadoiro ten un orzamento de 11,4 M€ dos cales a Xunta achega 4,3 M€.

Ao investimento da contratación destas obras, por case 20 M€, hai que sumar as correspondentes ás asistencias técnicas, o que eleva o investimento autonómico a case os 21 M€.

A achega autonómica para a construción da estación intermodal de Lugo elévase aos 12,8 M€, incrementando un 50 % máis do que lle correspondería para a terminal de autobuses.

A intermodal de Lugo complétase cos traballos na estación de ferrocarril, que inclúe un novo edificio e un paso inferior e a integración urbana, a construción dun novo paso de cidade, un paso inferior peonil entre o centro urbano e o parque Sagrado Corazón, que conectará ambos os lados das vías vertebrando a cidade.

O proxecto da intermodal de Lugo será cofinanciado polo Fondo Europeo de Desenvolvemento Rexional, a través do programa operativo Feder Galicia 2021-2027.

Os Orzamentos da Xunta de 2024 reservan unha partida de 5,75 millóns de euros para iniciar as obras da estación de autobuses intermodal na vindeira primavera.