O proxecto SUS-SOIL procura a avaliación da saúde e funcionalidade dos solos baixo diferentes cultivos

O equipo da Universidade da Coruña formado por investigadores do grupo Xestión Sostible dos Recusos Hidrícos e do Solo (AQUATERRA), participa no proxecto europeo SUS-SOIL.

Esta iniciativa, coordinada pola USC xunto cun consorcio de 25 socios, entre eles a UDC, participará na avaliación da saúde e funcionalidade dos solos baixo diferentes estratexias agroecolóxicas de manexo de cultivos, establecendo 15 experiencias piloto en toda Europa, para determinar o seu grao de sustentabilidade.

O equipo de traballo da UDC está coordinado pola investigadora Ramón y Cajal Vanessa Álvarez López, xunto con Eva Vidal Vázquez, profesora titular; Marcos Lado Liñares, Profesor contratado doutor; e Manuel López Vicente, investigador distinguido contratado no programa de atracción da Xunta de Galicia; todos do Departamento de Física e Ciencias da Terra.

SUS-SOIL, que acadou unha financiación de 7 millóns de euros do programa Horizonte Europa, busca estudar a saúde dos solos desde diversas perspectivas, incluíndo caracterizacións químicas e físicas, pero tamén propiedades biolóxicas. Outra das liñas de traballo do proxecto é o estudo da capacidade dos solos para secuestrar carbono, o cal é de gran interese na rexión de Galicia polas características dos nosos solos.

Está previsto que as primeiras etapas do proxecto dean comezo en outono deste ano. A investigadora Vanessa Álvarez López, coordinadora do equipo de traballo da UDC, destaca que a financiación de proxectos de investigación multidisciplinares na que se poña en relevo o papel da microbioloxía do solo, é clave para dar valor aos sistemas agrarios sostibles a longo prazo.