O festival internacional 'Pint of Science' levará a ciencia a bares de Vigo e Ourense

A cita será os días 13, 14 e 15 de maio e permitirá que o público asistente poida coñecer liñas e proxectos de investigación en áreas moi diversas explicadas polo persoal científico empregando unha linguaxe comprensible e próxima. Nas cidades de Vigo e Ourense participarán un total de 19 investigadores e investigadoras destes campus, xunco con outros expertos doutras universidades e entidades.

Doce charlas en dous bares de Vigo

En Vigo haberá un total de doce charlas sobre seis temáticas diferentes, 11 das cales estarán a cargo de investigadores e investigadores pertencentes a grupos e centros de investigación da Universidade de Vigo como atlanTTic (Centro de Investigación en Tecnoloxías de Telecomunicación), CIM (Centro de Investigación Mariña), CINBIO (Centro de Investigación en Nanomateriais e Biomedicina), Cintecx (Centro de Investigación en Tecnoloxías, Procesos Industriais), Ecobas (Economics and Business Administration for Society), e o VQCC (Vigo Quantum Communication Center). Tamén haberá unha charla dunha investigadora pertencente ao IIM-CSIC (Instituto de Investigacións Mariñas).

Dentro das diversas temáticas, nas charlas trataranse temas de actualidade como o impacto da Intelixencia Artificial na sociedade, a importancia do enfoque circular e sostible nas actividades que afectan á contorna ou a necesidade de cuestionarse a veracidade nas imaxes e vídeos que se comparten nas redes sociais.

As charlas son de acceso libre e gratuíto, ata completar aforo, e serán os días 13, 14 e 15 de maio a partir das 20.00 horas no bar Cañaveral, situado na Portal do Sol, 6, e no bar El Castro, na rúa Paseo de Alfonso XII, 2. Ademais de charlas, a programación de Pint of Science Vigo incluirá concursos como o Trivial científico e sorteos con regalos para o público asistente. Toda a información sobre as charlas e as actividades está dispoñible na páxina web do evento.

Sete charlas no bar Torgal e no café-centro cultural El Cercano de Ourense

En Ourense terán lugar un total de sete charlas ao longo de tres días (13, 14 e 15 de maio), nas cales sete investigadores que desenvolven o seu traballo e/ou están vencellados á provincia de Ourense, tocarán unha ampla diversidade de temáticas. Estas abranguerán dende os trastornos alimentarios até a pegada do Homo Erectus organizadas en catro temáticas: Mente marabillosa, A nosa sociedade, Tech me out! (tecnoloxía) e Planeta Terra.

Entre os grupos, institucións e centros de investigación aos que pertencen os e as poñentes, destaca a UVigo a través do GEAAT (Grupo de Estudos de Arqueoloxía, Antigüidade e Territorio), así como a UNIR (Universidade de Logroño) e a Universidade de Santiago de Compostela. Así mesmo, o evento contará coa colaboración do Campus Auga e a Facultade de Historia de Ourense.

As charlas serán de acceso libre e gratuíto ata completar aforo os días 13, 14, e 15 a partir das 19.00 h no bar Torgal (rúa Celso Emilio Ferreiro, 20) e no café-centro cultural El Cercano (rúa Cardenal Quevedo, 20). A programación recolle as charlas coma base para promover o intercambio e difusión cultural e científica na sociedade. Neste contexto, ademais das ponencias haberá sorteos con regalos para o público. A información do evento pódese atopar aquí.