Terminator, A Nightmare on Elm Street e Pequefreak na primeira fin de semana do GFFF

Nela estiveron presentes representantes do Centro Comercial, os Cines Tamberlick e a Sala Apo’strphe, os dous espazos nos que se celebra o GFFF. Juan de Castro, director do festival animou “a todo o mundo a achegarse ao GFFF, sexan ou non consumidores habituais de cine de xénero, pois a calidade das proxeccións e o ambiente do Galician Freaky Film Festival son capaces de encadilar a calquera”. O responsable mencionou tamén o aumento de público nas últimas edicións, o que fai que o certame creza cada ano tamén en número de actividades.

Inauguración: dobre sesión con The Terminator e A Nightmare on Elm Street

O festival arrinca este venres, 20 de setembro, nos Cines Tamberlick, cunha festa de inauguración na que se proxectarán os dous filmes homenaxeados nesta edición: The Terminator e A Nightmare on Elm Street, dúas iconas do cine dos anos 80 que celebran o seu 40º aniversario.

A inauguración será unha dobre sesión, un formato moi habitual nos cines nos anos 80 e 90 e en desuso actualmente, no que se ofrecían dous filmes seguidos por un prezo reducido. Nesta ocasión, a entrada a ambos filmes ten un prezo de 10,00 € e pode adquirirse na web do GFFF.

Ás 19:00 prenderanse o proxector para desfrutar de The Terminator primeira entrega da icónica saga dirixida por James Cameron e protagonizada por Arnold Schwarzenegger. Está permitido, e mesmo recomendado, berrarlle a pantalla” Corre, Sarah Connor”.

Seguidamente, e tras un breve parón para tomar un refrixerio e unhas cervexas na Sala Apostrophe, volveremos aos Cines Tamberlick ás 22:30h, para morrer de medo con outro fito da cultura popular mundial e, máis concretamente, do terror, A Nightmare on Elm Street, filme dirixido por un dos pais do cinema de terror moderno, Wes Craven.

Tras as proxección faremos un coloquio co especialista de FX Ricardo Spencer que nos explicará como se fixeron algúns dos efectos especiais máis recordados destes dous filmes.

O Pequefreak

Na xornada do sábado 21 os protagonistas son os pequenos da casa coa irrupción do Pequefreak, o festival para cautivar ao público miúdo coas mellores curtametraxes internacionais especialmente seleccionadas para a infancia.

A xornada comeza cun obradoiro impartido por Ricardo Spencer de efectos especiais, nos que os nenos a partir de 7 anos aprenderán as bases do chroma e a manufacturar feridas moi realistas con ingredientes caseiros. A partir das 12:30 proxectaranse tres bloques de curtametraxes da Selección Oficial que os nenos valorarán a través dos aplausos, recollidos polo célebre aplausómetro do festival. A curta máis aplaudida alzarase co premio “Olimpo dos Pequefreaks 2024”.

Ás 19:00 pequenos e adultos poderán celebrar o 40º aniversario dun dos mellores filmes infantís do cinema europeo: La Historia Interminable, na súa versión en castelán. Unha viaxe a mundos imaxinarios e afastados dirixida por Wolfgang Petersen.

A Selección Oficial

O espiñazo do festival é a súa Selección Oficial formada por 60 curtametraxes internacionais chegadas de 29 países diferentes. Unha escolma que inclúe unha estrea mundial, cinco estreas europeas, 15 filmes inéditos en España e outros 25 que nunca foron proxectados en Galicia. O traballo de todo un ano visualizando e colleitando o mellor cine fantástico, terror e bizarro por todo o mundo, exhibido en Vigo para desfrute dos freaks máis exquisitos.

As curtametraxes están divididas en bloques temáticos, como Ciencia Ficción, Humor Freak, Serie B-estial, Co cu torcido, Arrepío, ou as inclasificables Que carallo e isto?. Todas elas serán sometidas ao veredicto do xurado e do público e optarán a alzarse con algún dos oito premios que reparte o certame.