Barreiro convida aos lucenses ao uso de bicicletas para lograr unha cidade máis verde e sostible

O vicepresidente segundo e conselleiro de Medio Ambiente, Xosé Manuel Barreiro Fernández, inaugurou a iniciativa Lugo Xira polo Medio Ambiente mediante un paseo en bicicleta polo Campus. Este programa que hoxe comeza pretende que os lucenses empreguen as bicicletas como medio alternativo de transporte, apostando así por “unha cidade máis verde e sostible”, tal e como destacou Xosé Manuel Barreiro. O titular autonómico indicou que non utilizar os vehículos privados dentro das cidades “é a mellor opción para minimizar custos ecolóxicos e económicos realmente elevados”.

Lugo Xira polo Medio Ambiente quere fomentar o uso urbano dun transporte non contaminante como son as bicicletas. A través desta iniciativa, a Consellería de Medio Ambiente incorpora a cidade de Lugo aos actos de conmemoración do Día Mundial do Medio Ambiente, que ten lugar o vindeiro 5 de xuño, e que este ano se celebra baixo o lema “Cidades verdes, cidades sostibles”. Xosé Manuel Barreiro salientou que este programa debe servir para que os lucenses aposten pola sostibilidade a partir de simples xestos da vida cotián, como o desprazamento.

PROGRAMA

Lugo Xira polo Medio Ambiente ofrece a posibilidade de empregar unha bicicleta durante todo o día aos lucenses e visitantes que o desexen. As persoas interesadas só teñen que inscribirse no programa en algún dos sete centros de préstamo distribuídos por toda a cidade. Estas casetas sitúanse na Biblioteca Intercentros do Campus de Lugo, o Museo Provincial de Lugo, o IES Lucus Augusti, o Colexio EIP Paradai, o Colexio EIP Sagrado Corazón, IES A Piringalla, e por último, o IES Leiras Pulpeiro. As casetas están abertas ininterrompidamente de 10 da mañá ata as nove da noite e durante todos os días da semana.

Os interesados deberán cumprimentar unha folla de inscrición cos seus datos persoais, así como un compromiso de devolución e adhesión ás normas de uso responsable e comportamento cívico. Os usuarios deberán ser adultos maiores de 18 anos. Unha vez cuberta a inscrición, cada usuario recibirá a súa bicicleta, xunto cun casco, un chuvasqueiro, unha mochila, unha camiseta e un cadeado antirroubo para a bici. O empréstito é totalmente gratuíto e será válido para unha xornada completa.

A Consellería de Medio Ambiente pon en marcha esta iniciativa en Lugo como unha experiencia piloto en Galicia para comprobar o seu grao de aceptación entre a cidadanía e para fomentar o uso de transportes urbanos non contaminantes. Segundo Medio Ambiente, se a experiencia ten boa acollida en Lugo está previsto que poida desenvolvese noutras cidades galegas.