Manuel Fraga asegura que a Xunta está a investir todos os seus esforzos para que a saída da Volvo Ocean Race de Galicia sexa a máis espectacular da súa historia

O titular do Goberno galego, Manuel Fraga, asegurou que dende a Xunta de Galicia se están investindo “todos os nosos esforzos, o noso traballo e a nosa ilusión para que a vindeira cita do 12 de novembro”, a saída da Volvo Ocean Race, en Vigo, “se converta na máis espectacular e fermosa da súa historia”. O presidente da Xunta fixo estas declaracións esta tarde, en San Caetano, logo da sinatura dun convenio co director xeral de Caixanova, Julio Fernández Gayoso, para colaborar na promoción da regata.

Mediante este convenio asinado entre os máximos representantes da Xunta de Galicia e de Caixanova, esta entidade financeira convértese en patrocinador oficial da proba, colaborará na difusión da proba e achegará para tal finalidade un total de 2.400.000 euros.

Na súa intervención, o xefe do Executivo galego agradeceu a colaboración desta entidade financeira “fundamental no tecido social e productivo da nosa comunidade”, dixo, salientando que este acordo “significa a forte aposta” de Caixanova “por un ambicioso proxecto que marcará, con toda probabilidade, un antes e un despois na historia da náutica galega”. Así mesmo, destacou que “a promoción deportiva e turística contribuirán”, “grazas” aos patrocinadores, a incrementar a “notoriedade” da regata.

NO TOP TEN DO DEPORTE

Para Manuel Fraga, para que a VOR sexa un éxito “é necesaria a implicación e o apoio incondicional de tódolos sectores da sociedade galega”. Neste contexto, subliñou que con este acordo, co que Caixanova “asume o compromiso de vincular a súa imaxe corporativa e a súa actividade comercial coa saída dende Galicia da Volvo Ocean Race”. Xustamente por este compromiso o xefe do Executivo autonómico “felicitou” á entidade. Manuel Fraga congratulouse polo “apoio” e “pola decisión de patrocinar un dos dez eventos deportivos máis importantes do mundo”.

Segundo manifestou o presidente da Xunta, participar nun evento do top ten do deporte mundial “incrementará o prestixio desta entidade, que une así o seu nome a Galicia e ao Deporte galego”.

PALABRAS DO PRESIDENTE DA XUNTA NA SINATURA DO CONVENIO DE COLABORACIÓN CON MOTIVO DA VOLTA AO MUNDO A VELA ENTRE A XUNTA DE GALICIA E CAIXANOVA

-“Dende a Xunta de Galicia estamos investindo tódolos nosos esforzos, o noso traballo e a nosa ilusión para que a vindeira cita do 12 de novembro se converta na máis espectacular e fermosa das saídas da historia da Volvo Ocean Race”.

- “Para que isto sexa posible é necesaria a implicación e o apoio incondicional de tódolos sectores da sociedade galega”.

- “A sinatura de hoxe deste convenio de patrocinio con Caixanova, institución fundamental no tecido social e productivo da nosa comunidade, significa a forte aposta desta entidade por un ambicioso proxecto, que marcará, con toda probabilidade, un antes e un despois na historia da náutica galega”.

-“Con este acordo, Caixanova asume o compromiso de vincular a súa imaxe corporativa e a súa actividade comercial coa saída dende Galicia da Volvo Ocean Race e achegar este acontecemento aos seus clientes a través da súa estructura comercial e rede de oficinas (máis de catrocentas) no territorio español”.

- “A promoción deportiva e turística contribuirá, grazas ao apoio de Caixanova, a incrementar a súa notoriedade e acadar que todos os esforzos repercutan no éxito da regata”.

- “Quero, por tanto, felicitar a Caixanova polo seu apoio e pola súa decisión de patrocinar un dos dez eventos deportivos máis importantes do mundo. Estou convencido de que, con esta iniciativa, tamén se verán incrementado o prestixio desta entidade que une así o seu nome a Galicia e ao Deporte galego”.

FICHA TÉCNICA

-Obxecto: o presente convenio de colaboración entre a Xunta de Galicia e Caixanova ten por obxecto regular a participación desta entidade financeira na Volta ao Mundo a Vela.

Mediante esta sinatura, Caixanova adquire a condición de patrocinador de Galicia 2005, Volta ao Mundo a Vela, con tódolos dereitos e obrigas inherentes a tal condición. Así mesmo, colaborará coa Fundación Galicia Deporte Galego na elaboración dun proxecto de comunicación no que se fixarán e se determinarán a cronoloxía das actividades, a imaxe e contidos da VOR.

A entidade financeira Caixanova comprométese coa rúbrica deste acordo a achegar un total de 2.400.000 euros e a colaborar na difusión e promoción da Volta ao Mundo a Vela a través dos distintos medios e soportes utilizados por ela nas súas campañas de publicidade.