Os participantes nas III Xornadas Ciencia e Territorio identifican a Santolina Melidensis, especie exclusiva da comarca da terra de Melide e advirten sobre o perigo da súa desaparición

Identificaron, en primeiro lugar a “Santolina Melidensis”, unha planta cunha pequena flor amarela que é unha especie endémica da Terra de Melide, e de aí o seu nome. Aínda que foi doado atopar exemplares desta especie durante o traballo de campo desenvolvido pola mañá, os participantes, dirixidos polos profesores da Facultade de Farmacia da USC Ramiro Iglesias Louzán e Juan Rodríguez Oubiña, advirten sobre o perigo que representa sobre todo certo tipo de aproveitamento forestal (o eucalipto, o piñeiro...) e mesmo a roturación de montes, para a supervivencia desta especie. Precisamente por tratarse dunha especie emblemática da Terra de Melide, alertan sobre a necesidade de conservar esta especie, tendo en conta que require moito sol e que, unha vez que se ve rodeada de árbores que llo quiten, morre. Achégase a este comunicado unha copia do tríptico que anuncia as Xornadas, no cal se reproduce unha imaxe desta especie.
No transcorrer do traballo de campo foron identificadas tamén outras
especies raras (aínda que non exclusivas da Terra de Melide) como a “Leucanthenum gallaecicum”, estudada polos profesores Rodríguez Oubiña e Ortiz, relatores/as nas Xornadas, e moi difícil de atopar.
Pola tarde os participanets desenvolveron dous obradoiros. Un, dirixido polo profesor da USC Ramiro Iglesias Louzán, sobre a
clasificación do material recollido nas saídas de campo de cara á
elaboración de herbarios, e no cal foron estudadas tamén as
propiedades específicas dalgunhas das especies atopadas.
O segundo obradoiro estivo centrado na elaboración de cosméticos e sales de baño a partir do material vexetal recollido nas saídas de
campo. Este segundo obradoiro estivo dirixido polas farmacéuticas
responsables da Cooperativa Milhulloa, empresa que desde a Terra de Melide comercializa produtos ecolóxicos.
En definitiva, e como conclusión da segunda xornada de traballo,
despréndese que debido ao carácter exclusivo dalgunhas das especies estudadas, sería preciso que a administración elaborase, en colaboración coa poboación local, un plan serio de conservación que mesmo podería asumir certos impactos como o da autovía Santiago-Lugo, se esta se trazase polas proximidades do actual Parque Empresarial de Melide.