Medio Ambiente financiará a segunda fase da rede de sumidoiros de Santa María do Campo (Marín)

A Consellería de Medio Ambiente financiará a execución da segunda fase da rede de sumidoiro da parroquia de Santa María do Campo, pertenecente ao Concello de Marín. A este compromiso chegou o titular do departamento autonómico, Manuel Vázquez, no transcurso dunha reunión que mantivo en San Lázaro co alcalde en funcións do municipio pontevedrés, Alfonso Blanco e co concelleiro de Servicios, Xosé Manuel Portela, que estiveron acompañados na reunión por un grupo que veciños da parroquia.

Dada a urxencia da obra, Manuel Vázquez comprometeuse a iniciar de inmediato a tramitación administrativa do proxecto que propón o rexedor de Marín, que supón unha inversión de preto de 200.000 euros. O titular de Medio Ambiente e Desenvolvemento Sostible declarou que se vai a dar “prioridade” a esta actuación en resposta ás peticións realizadas polos responsables municipais, quen lle puxeron de manifesto as carencias de saneamento que ten o citado núcleo.

A nova infraestructura beneficiará a unhas 800 persoas que residen nesta parroquia, pertencente ao Seixo, un dos núcleos de poboación máis importantes de Marín.