A Consellería de Medio Ambiente costeará as obras de mellora de infraestructuras de abastecemento no concello de Vimianzo

A Consellería de Medio Ambiente e Desenvolvemento Sostible costeará novas infraestructuras de abastecemento de auga no Concello de Vimianzo. Así llo confirmou o titular do departamento autonómico, Manuel Vázquez, ao rexedor da localidade coruñesa, Alejandro Rodríguez Lema, nun encontro que tivo lugar na sede da consellería en Santiago de Compostela.

Manuel Vázquez afirmou que esta nova rede que a consellería executará a través do seu organismo autónomo Augas de Galicia virá a solventar as carencias de suministro existentes en varios núcleos do concello coruñés. Concretamente, beneficiaranse deste proxecto as poboacións de Grixoa, Petón, Romar, Berdoias e Pedreiro de Arriba e de Abaixo.

Nas vindeiras semanas, técnicos de Augas de Galicia desprazaranse ata o Concello de Vimianzo para poñer en marcha o proxecto definitivo para poder acometer canto antes estas actuacións, que suporán unha inversión de aproximadamente 500.000 euros.

O rexedor foi recibido tamén polos responsables das direccións xerais de Conservación da Natureza, Xosé Benito Reza, e Desenvolvementos Sostible, Emilio Fernández Suárez, con quen analizou a posta en marcha de novos proxectos medioambientais, que se darán a coñecer nas vindeiras semanas.