Medio Ambiente financiará con 60.000 euros a finalización da rede de auga de Vilardevós

O conselleiro de Medio Ambiente, Manuel Vázquez, acordou co alcalde de Vilardevós (Ourense), José Luis Pérez, a firma nas vindeiras semana dun convenio polo que este departamento da Xunta financiará cunha achega de 60.000 euros a finalización das obras de renovación da rede de abastecemento e saneamento de auga do núcleo central deste municipio, así como a construcción dunha Estación de Tratamento de Auga Potable (ETAP). Este foi o principal acordo acadado durante a reunión que mantiveron na sede da Consellería en Santiago Manuel Vázquez e José Luis Pérez.

O rexedor desta localidade ourensá solicitou ao responsable de Medio Ambiente da Xunta de Galicia a súa colaboración para realizar diversas obras de abastecemento de auga en varios núcleos de poboación especialmente danados pola seca deste verán. José Luis Pérez explicou que se necesita construír unha estación de bombeo de auga, un novo depósito e renovar a rede de abastecemento da zona vella de Berande, entre outras actuacións. O alcalde de Vilardevós comprometeuse a remitir á Consellería unha memoria de tódalas obras necesarias para rematar cos problemas de abastecemento de auga e posibilitar así a súa inclusión nos Orzamentos Xerais da Comunidade Autónoma.