O presidente da Xunta transmite aos alcaldes a vocación do Goberno galego de resolver con transparencia o conflicto das infraestruturas rurais

O presidente da Xunta, Emilio Pérez Touriño transmitiulles aos alcaldes a vocación da Xunta de Galicia de resolver con transparencia á problemática xurdida pola paralización de obras do anterior goberno, no medio rural. Pérez Touriño lembroulles que “a suspensión de obras afecta con carácter horizontal a todos os concellos de Galicia” independentemente da cor política que teñan. “É importante que todo o mundo teña claro que non estamos actuando con ningún criterio partidario, ou sesgado, senón todo o contrario” sinalou.

O mandatario galego explicoulles que a Xunta tomou esta determinación por motivos de saneamento, eficacia, e de xestión política e administrativa. Transmitiulles que se poñerá en marcha un novo plan que nacerá coa vocación impulsar as máximas actuacións posibles de acordo aos novos criterios e ás capacidades orzamentarias. Touriño explicoulles que se dará conta do plan ao Parlamento e á propia Fegamp.

Touriño que se reuniu coas alcaldesas de Melide e Cartelle e cos alcaldes de Cambados e de Antas de Ulla, amosouse convencido de que unha porcentaxe moi alta das actuacións poderán ser incorporadas sempre que se axusten a criterios transparentes e horizontais.

O presidente da Xunta reiteroulles que haberá obras que non poderán ser realizadas e lembroulles que de feito a propia Fegamp entendía que existían obras que non tiñan que ver coa actuación de medio rural, como por exemplo piscinas e tanatorios.