Celébrase o IV Torneo de Tiro Olimpico Concello de Carral

Este evento deportivo, que se disputará o longo do ano 2006 (o segundo sábado de cada mes), está organizado polo Club de Tiro Olímpico de Carral coa colaboración do Concello de Carral. Na primeira xornada desta cuarta edición, participaron 42 tiradores de toda a provincia divididos en 9 categorías diferentes, que abarcan tódalas idades e ámbolos dous xéneros. Ano tras ano, esta competición consolídase coma un dos torneos máis importantes da Comunidade Galega.

Disputada esta primeira xornada, que deu inicio á competición anual, Miguel Sánchez acadou o primeiro posto do ranking na categoría infantil masculino, na modalidade de pistola. Na categoría sénior masculino, na modalidade de carabinas miras pechadas foi Jesus García o que se alzou co primeiro posto da clasificación. Finalmente Jorge Sánchez, gañador na anterior edición do torneo, comezou a actual dominando na categoría sénior na modalidade de pistola.


Unha vez rematada a xornada deportiva, celebrouse, o redor das 22.00 h, unha cena-baile na que tivo lugar a entrega de trofeos e clausura correspondente á III edición deste Torneo. Ó mesmo tempo, quedou inaugurada esta nova edición 2006. Despois, a alegría e a diversión durou ata preto das tres da madrugada



O concelleiro de deportes, Jesús Raso López, e o presidente do club de Tiro Olímpico de Carral, J. Carlos Mena, mostráronse enormemente satisfeitos polo éxito e importancia que esta a acadar este torneo na comunidade galega. Agardan que esta nova edición o converta nun clásico dentro do circuíto de competicións da modalidade deportiva.