O número de parados descendeu en Galicia en 2005 en 18.200 persoas, segundo a Enquisa de Poboación Activa (EPA)

Segundo se recolle na Enquisa de Poboación Activa do cuarto trimestre de 2005, feita pública polo Instituto Nacional de Estadística, Galicia rexistrou un incremento en termos absolutos de 24.043 ocupados con respecto ao segundo trimestre de 2005, o que fai que o total de ocupados galegos se eleve ata 1.137.443 persoas, das que un 42,79% son mulleres. Así mesmo a taxa de paro do último trimestre de 2005 sitúase no 9,13% o que supón unha reducción de dous puntos con respecto ao primeiro semestre do ano. Por sexos as mulleres representan o 60,45% do total de desempregados galegos, que se sitúa en 114.254 persoas, é dicir, 4.654 desempregados máis que no terceiro trimestre de 2005. Sen embargo esta última comparación, entre o terceiro e o cuarto trimestre do ano, non é representativa polo anómalo dos resultados obtidos pola Enquisa de Poboación Activa no terceiro trimestre do ano.

Evolución Interanual

Nos últimos doce meses, Galicia incrementa os seus ocupados en 16.500 persoas, e ao mesmo tempo reduce os parados en 18.200. Así, a comparativa entre o cuarto trimestre de 2005, datos estes corrixidos do impacto dos cambios da EPA, e o mesmo período de 2004, da como resultado un importante incremento de ocupados e un forte descenso de parados.

Este bo comportamento ven confirmado polos bos resultados obtidos na afiliación á Seguridade Social, que ven medrando a bo ritmo ao longo de todos os meses de 2005, que por outra parte se ten acelerado no segundo semestre, de tal xeito que a taxa interanual máis elevada é precisamente a correspondente a decembro de 2005, que se sitúa no 3,5%. Entre os meses de decembro de 2004 e 2005, a poboación galega afiliada á Seguridade Social incrementouse en 33.500, cifra que coincide practicamente co aumento do emprego estimado pola EPA entre os dous últimos trimestres dos anos citados.

A isto hai que engadir a boa evolución do paro rexistrado, cunha media anual de diminución de case un punto, reducción que se da por primeira vez dende o ano 2001.

Ao abeiro destes datos, e tendo unha completa información de 2005, tanto da Enquisa de Poboación Activa, como dos rexistros laborais, este panorama ven a confirmar a boa tendencia do mercado de traballo en Galicia.