Pesca participará na rehabilitación do Museo Escola de Actividades Náuticas de Muros

A Conselleira de Pesca e Asuntos Marítimos, Carmen Gallego Calvar, comprometeuse esta tarde coa alcaldesa de Muros, Caridad González Cerviño, a financiar parte do equipamento interior do futuro Museo Escola Náutica de Muros, que estará ubicada na antiga fábrica de salazón local e que “contribuirá ao coñecemento da cultura mariñeira”. Gallego Calvar destacou neste senso a importancia de todas as iniciativas que, como a de Muros, se están levando
a cabo na comunidade galega e que teñen como obxectivo a divulgación, ao
público en xeral, de todas as actividades tradicionais do mundo do mar.

O proxecto exterior, que se iniciará este mismo ano e que conta coa
financiación do Ministerio de Medio Ambiente, vinculará a actividade
museística coa parte teórica e terá unha dotación de máis de dous millóns
e medio de euros, que se encargará de licitar Costas do Estado.

O Museo rehabilita o edificio mediante a reposición da estrutura
primitiva da cuberta en madeira e aceiro, creando un único espazo
interior cheo de historia. Contará cunha biblioteca aberta ao mar
mediante unha cristaleira, mentres que a Escola estará emprazada en tres
edificacións diferentes. No primeiro edificio, situarase a área de
administración e as aulas teóricas e contará asimesmo cun núcleo para
vestiarios, áula de buceo, piscina de práctica e un pequeno taller de
mantemento para servizo da escola e os locais técnicos. O segundo edificio
albergará unha cociña, o comedor e unha zona de descanso. Nesta planta
contruiranse tamén dormitorios tanto para os alumnos como para o
profesorado. No terceiro edificio haberá tamén dormitorios e vestiarios, e
dependencias auxiliares para o almacenamento do material de buceo e
navegación.

A alcaldesa de Muros amosouse moi agradecida polo apoio recibido por parte
da Consellería de Pesca, que contribúe a facer realidade este ambicioso
proxecto arquitectónico e educativo.