Pesca fixa o inicio da parada biolóxica do polbo no 19 de maio

A Consellería de Pesca e Asuntos Marítimos consensuou con representantes das confrarías de pescadores de Galicia e as principais organizacións sindicais o borrador da Orde na que se establecerán as condicións definitivas do Plan de
Recuperación do Polbo, así como as bases para a concesión de compensacións
financeiras ao sector afectado pola paralización temporal da súa
actividade. Con este obxectivo, o director xeral de Recursos Mariños,
Francisco Fernández Cortés; e o director xeral de Estruturas e Mercados da
Pesca, Manuel Cabirta, mantiveron unha xuntanza esta mañá en San Caetano
coa Comisión Sectorial de Artes Fixas e Menores en Caladoiro Nacional,
integrada no Consello Galego de Pesca.

Tras esta reunión, o departamento que dirixe Carmen Gallego acordou co
sector establecer unha parada biolóxica en toda Galicia durante dous meses,
dende o 19 de maio ata o 19 de xullo do 2006. Con esta veda, a Consellería
de Pesca pretende dar o primeiro paso na recuperación das poboacións de
polbo, permitindo incorporar novos reclutas ás mesmas e aumentar a biomasa
dos individuos xa presentes no stock.

A orde consensuada hoxe cos membros da Comisión de Artes Fixas e Menores do
Consello Galego de Pesca será refrendada en breve polo Consello da Xunta
para a súa inmediata publicación no Diario Oficial de Galicia (DOG).

Compensacións a tripulantes e armadores

O Goberno galego comprométese a compensar economicamente aos pescadores
debidamente enrolados e aos propietarios dos buques con porto base en
Galicia que teñan no seu permiso de explotación a arte de nasa de polbo e
se vexan afectados por esta paralización. Neste senso, Pesca subvencionará
integramente o período de veda aos tripulantes (un total de 42 días
laborais), recibindo cada un deles 45 euros por día de parada . No caso dos
propietarios, a Dirección Xeral de Estruturas acordou indemnizarlles un
total de trinta días seguindo os seguintes parámetros: os propietarios dos
barcos que teñan unha potencia maior de 3GT percibirán cada día de paro
unha contía fixa de 30 euros, ademais de cinco euros por cada GT da
embarcación; de teren unha potencia inferior, a cantidade fixa a percibir
increméntase ata os 45 euros.

Para poder acceder a estas compensacións económicas os armadores deberán acreditar que durante os anos 2004 e 2005 despacharon a nasa de polbo máis de 70 días. Ademais será necesario que, nese mesmo período, os barcos de
2,5 GT ou de máis potencia xustifiquen unha venda en lonxa superior aos
1.500 quilos, e de máis de 1.000 quilos no caso das embarcacións que teñan
unha potencia inferior. No que se refire aos tripulantes, estes deberán
acreditar estar debidamente enrolados e ter a condición de mariñeiro a lo
menos un período de seis meses no ano anterior á paralización.

Por outra banda, no momento no que se faga a apertura da pesqueiría do
polbo, a Consellería de Pesca levará a cabo un control do esforzo pesqueiro
a través de diversas medidas consensuadas co sector. Neste senso, a partir
do 20 de xullo, coincidindo coa finalización da veda, as embarcacións
limitarán as capturas a pezas dun quilo por unidade e os desembarcos de
polbo a un tope máximo de 40 quilogramos por tripulante e día. A talla do
cefalópodo poderá ser modificada a partir do 31 de decembro do 2006, sempre
e cando o estado do recurso así o permita. Asemade, o horario estipulado
para faenar no caladoiro será dende as seis da mañá ata as seis da tarde.

Plans zonais

Finalmente, o departamento que dirixe Carmen Gallego aprobará a partir do
un de xaneiro de 2007 os plans zonais de explotación do polbo, co que se
habilitará un sistema de explotacion axeitado ás características das
diferentes zonas onde se atopa o recurso. Establecerase, como mínimo, un
plan para a costa cantábrica, outro para a costa noroeste así como un para
a zona das Rías Baixas.

O Plan de Recuperación do Polbo forma parte das liñas de actuación
directas que emprendeu a Consellería de Pesca xunto co sector para
afrontar os problemas que actualmente afectan aos traballadores do mar,
entre os que se atopa precisamente o mal estado do stock do cefalópodo.