O conselleiro de Presidencia visita en Vimianzo e Laxe obras de recuperación e acondicionamento promovidas pola Fundación Arao

O conselleiro de Presidencia, Administracións Públicas e Xustiza, José Luis Méndez Romeu, realizou unha visita aos concellos de Vimianzo e Laxe, onde puido coñecer as obras de recuperación e acondicionamento do entorno promovidas pola Fundación Arao nestes dous municipios. O titular de Presidencia comezou o seu itinerario en Vimianzo, onde estivo acompañado polo alcalde, Alejandro Rodríguez Lema.

Os traballos que a entidade desenvolve neste concello están situados no entorno da Ría de Cereixo, onde se está a levar a cabo unha ordenación do aforo de visitantes mediante a creación de infraestructuras peonís e a remoción da área de descanso que existe na actualidade.

Así mesmo, estase a construír un xardín botánico cunha mostra permanente de flora e un observatorio de aves. As obras, cun orzamento de 300.000 euros, están nun avanzado estado de execución, e está prevista a súa finalización nos dous próximos meses.

Acondicionamento no entorno do Faro de Laxe

A continuación, o conselleiro viaxou ata Laxe, onde visitou as obras promovidas pola Fundación Arao na área recreativa da zona do Faro de Laxe, que se está adecuando para o seu uso público coma zona de descanso e de recreo. Este terreo consta dunha área pechada e cercada por matos da zona, onde se sitúan pequenas edificacións que simulan antigas construccións de carácter celta.

Estas construccións, deseñadas a semellanza das tradicionais pallozas, están formadas por un peche de mampostería de pedra da zona, e albergan no seu interior unha mesa e bancos de cantería, así coma unha grella. Nestes traballos, que teñen un orzamento de 120.000 euros, tamén se levou a cabo o empedrado dos accesos á zona.