Fernández de la Cigoña eloxiou a Lugrís por escribir cando “apenas había lectores en galego” na inauguración da IX Feira do Libro Galego en Tui

O escritor e naturalista Estanislao Fernández de la Cigoña foi o responsable de inaugurar a IX Feira do Libro Galego no Paseo da Corredera en Tui. Ata as dez da noite dezaseis postos de libros das Librerías Iris e Valverde ofrecen un amplísimo abano de publicacións, nas que se atopan as últimas novidades editoriais ou clásicos da literatura, e onde non faltan os exemplares de escritores tudenses coma Ernesto Iglesias Almedia, Alberto Romer, Xesús Vila, Emilia Rosende ou Luis Bugarín e Conchi Regueiro. Precisamente esta última tiña na feira o seu último libro que acaba de sair do prelo. Trátase de “O Tesouro das ánimas” publicado por Bahía Edicións dentro da colección Meiga Morla.

Fernández de la Cigoña, con medio centenar de libros editados, destacou que 17 de maio era a festa para a familia que escribe referíndose a poetas, novelistas e ensaístas. Dos primeiros dixo que “xogando coa palabras fan versos”, mentres que os camiños dos novelistas “son curvos e tortuosos” e os ensaístas “buscan, atopan e desenvolven calquera circunstancia”. Este escritor e naturista manifestaba que “un pode morrer satisfeitos tras plantar unha árbores, ter un fillo e escribir un libro” engadindo que “o último son palabras maiores”. Tamén se referiu na súa intervención ao homenaxeado este ano no Día das Letras Galegas, Manuel Lugrís Freire, e indicou que “en época difícil cando a fala estaba desprestixiada” escribir en galego non era doado mentres que Lugrís o fixo aínda “apenas había lectores, hoxe as cousa mudaron”. Lembrando a Cunqueiro rematou a súa intervención desexando que “Galicia e o galego duren mil primaveras máis.”

O cambio de emprazamento a Feira do Libro Galego, que ata o de agora se celebraba na Praza de San Fernando, foi ben acollido polo público que incluso antes da inauguración comezou a visitar os postos situados no Paseo da Corredera. As libreiras, e a propia concellería de Cultura, tamén manifestaron a última hora da maña a súa ledicia pola boa marcha da feira que continuará ata ás dez da noite. Pola tarde xogos populares, monicreques e maxia, complementaran a oferta expositiva e venda de libros.