O sector de baixura presenta máis de 900 actuacións de investimento ao amparo da orde de axudas para proxectos colectivos

A Consellería de Pesca e Asuntos Marítimos informou no Consello da Xunta dos 136 proxectos presentados polo sector da baixura (frota artesanal e marisqueo) de xestión integral para o aproveitamento dos recursos mariños de Galicia. Estas inicitivas, que xurden do propio sector e comprenden un total de 905 actuacións de inversión, enmárcanse na orde do 30 de decembro de 2005 pola que se establecen as bases reguladoras para a concesión de subvencións. O obxectivo de Pesca con esta orde é promover e fomentar o desenvolvemento sostible da actividade económica derivada da explotación dos recursos pesqueiros e marisqueiros.

As iniciativas recibidas están organizadas por proxectos que foron promovidos por unha ou varias organizacións. Estes proxectos están divididos a súa vez en subproxectos que son os que definen os obxectivos concretos a realizar e especifican a inversión que se fai necesaria para levalos a cabo. O departamento que dirixe Carmen Gallego Calvar recibiu neste senso un total de 136 accións, que suporían unha inversión total de 19.207.253 euros e que engloban aspectos como novas vías de comercialización, formación, rexeneración dos bancos marisqueiros, vixiancia ou asistencias técnicas, entre outros.

A comarca de Arousa encabeza o número de solicitudes presentadas a Pesca cun total de 37 proxectos, seguida moi de preto por Vigo, que presentou 32 solicitudes. Pontevedra, Muros, Fisterra, A Costa da Morte, Coruña, Cedeira, A Mariña e A Guarda son algunhas das outras localidades costeiras de Galicia que optan ás subvencións para proxectos colectivos de xestión integral para o para o aproveitamento dos recursos mariños.

Proxectos que van desde a comercialización ata a vixilancia

Para mellorar e facer máis eficiente a xestión dos recursos é necesaria a ampliación dos colectivos sociais que participan na actividade de aproveitamento. Por elo, é preciso que as entidades sectoriais invirtan en tecnoloxía e unha destas inversións ten que ver coa incorporación de técnicos que permitan recoller información do estado do recurso para racionalizar as propostas de xestión. Neste senso, un 20,53% dos subproxectos presentados son de asistencias técnicas -un total de 63-, que conlevarían unha financiación de 1.436.676 euros.

As iniciativas vinculadas á comercialización son as que irrompen con máis forza nas peticións de axudas, xa que a participación dos produtores na comercialización dos produtos pesqueiros debería facilitar aos colectivos unha maior eficencia económica. A maioria dos proxectos presentados plantexan unha estratexia de comercialización conxunta.

No apartado de estudos, presentáronse un total de 9 solicitudes por parte de tres colectivos, catro confrarías e dúas entidades profesionais. A inversión neste eido sería de 556.708 euros e basicamente se trata de traballos destinados a ampliar os coñecementos sobre o estado das zonas de produción.

A maior parte das accións presentadas ao amparo da orde de Pesca son para a financiación dos traballos de aplicación de técnicas de semicultivo nos bancos marisqueiros tales como a preparación do sustrato ou a súa modificación, a limpeza de algas ou o aporte de semente. É importante suliñar neste intre que as zonas afectadas polas mortandades invernais puideron facer modificacións nos seus proxectos para paliar os efectos provocados por esta situación. Para actividades vencelladas á rexeneración presentáronse 94 subproxectos por valor de 5.152.137 euros.

Por último, nas iniciativas de protección dos recursos, que son tradicionais por parte das organizacións sectoriais para facilitar a organización da actividades de explotación, fináncianse fundamentalmente os costes de persoal de vixiancia. Neste apartado as subvencións solicitadas -un total de 64 subproxectos- ascenden a 4.678.753 euros.

A intención da Consellería de Pesca e Asuntos Marítimos con esta orde de axudas, que prima os proxectos colectivos e que está na liña dos novos Fondos Europeos da Pesca, é cambiar o sistema empregado durante o Goberno do Partido Popular, que non tiña ningunha orientación nin baremo para que se soubera cal era o sistema de aprobación deste tipo de iniciativas.