Os territorios en conflito protagonizan o II Foro Internacional de Fotoxornalismo e Sociedade: Revela 06

Palestina, Iraq, Congo, Sudán, Chechenia, Sahara e Haití; 53
destacados fotoxornalistas internacionais; 5 das principais axencias de información do mundo: Reuters, Cover, Panos Picture, Cosmos e Efe; 12 debates, talleres e proxeccións comentadas con conexión en directo con fotógrafos en zonas de guerra, son algúns dos contidos do II FORO INTERNACIONAL DE FOTOXORNALISMO E SOCIEDADE, REVELA 06, que baixo o nome de “Territorios en conflito” se celebra en Oleiros e A Coruña, do 29 de xuño ó 19 de xullo de 2006.

O Programa Oficial foi presentado polo fotógrafo Xosé Abad, director de REVELA, que destacou a excelente acollida internacional desta segunda edición, con máis de 300 imaxes de prestixiosos fotoxornalistas de todo o mundo. O acto estivo presidido polo alcalde de Oleiros, Ángel García Seoane e diversos organizadores de REVELA.

Tamén e participaron o Director Xeral de Acción Socio Cultural da
Fundación Caixa Galicia, José Manuel García Iglesias e o Patrono da Fundación Paideia, José Leyte Verdejo e a Delegadas Provincial da Consellería de Presidencia da Xunta de Galicia, Esther González Saavedra e da Consellería de Cultura da Xunta de Galicia, Milagros Lantes Seara, así como outros colaboradores do foro.

“A diáspora palestina”, do fotógrafo valisoletano Alfonso Moral,
proxecto seleccionado o pasado ano coa bolsa de 12.000€, e sobre o cal xira tematicamente Revela 06 baixo o nome de “Territorios en conflito”, é unha das 8 exposicións fotográficas que se realizarán nos parques, prazas e vías públicas de Oleiros e que buscan impactar, provocar a reflexión e, por suposto, o debate sobre algúns dos conflitos cos que convivimos.

Espazos públicos expositivos

Espazos públicos onde iraquís, congoleños, sudaneses, chechenos,
saharauís e haitianos se tornan protagonistas a través do traballo sempre comprometido de fotoxornalistas como Teun Voeten, Frederik Naumann ou Crispin Hughes da axencia británica Panos Picture, de Akram Saleh, Alí Jasim, Paul Hanna, Enrique Shore ou Juan Medina da tamén británica Reuters, Gabriel Tizón e Carlos de Andrés de Efe e Cover, respectivamente, e mais do fotógrafo vigués Javier Teniente.

REVELA 06 terá 3 foros sociais de debate onde vítimas, fotógrafos, xornalistas, intelectuais e público asistente afondarán nas causas de “Os territorios en conflito” e buscarán solucións, saídas pacíficas e respectuosas cos dereitos humanos. Cabe destacar a presenza do xornalista Jon Sistiaga, de Santiago Carrillo, ou do escritor e xornalista Manuel Rivas entre outros persoeiros.

Iraq en directo

Na Fundación Caixa Galicia da Coruña, a axencia Reuters fará unha
conexión en directo con todos os seus correspondentes de guerra
destinados en Iraq. Unha experiencia única que permitirá ó público asistente comprender o risco da cobertura informativa da noticia e a transmisión en tempo “real” dende unha zona de guerra.

Haberá 6 proxeccións comentadas onde os seus autores explican as
claves de cada reportaxe, as experiencias do traballo de campo e as dificultades de mergullarse nun territorio en conflito. Autores como Xulio Villarino da axencia Cover e premio Ortega e Gasset, David Beriain, correspondente de guerra de La Voz de Galicia, Walter Astrada premio Luís Valtueña de Fotografía Humanitaria, Luís López “Gabú” entre outros, con reportaxes de Kosovo, Timor, o Vodú,...

Cada ano REVELA conta coa xenerosa colaboración de fotógrafos de
prestixio internacional que comparten os seus coñecementos,
experiencias, técnica e principios éticos e creativos co público que participa de forma gratuíta. Esta edición os talleres contarán con Alfonso Moral, Teun Voeten, Enrique Shore e Juan Medina.

Nesta edición de REVELA NA ESCOLA, ademais da participación dos
centros de secundaria de toda Galicia reservarase un lugar nas
exposición en espazos públicos para a inclusión dos mellores traballos realizados polos mozos e mozas.

Percorrido por Galicia

Tras a finalización do II Foro Internacional de Fotoperiodismo e
Sociedade REVELA 06, as 7 exposícións denominadas "Territorios en
conflito", baixo o padroádego da Fundación Caixa Galicia, percorren as principais cidades de Galicia, estando confirmada a súa presenza en Santiago de Compostela, Vigo e Ourense.

O 30 de xuño de 2006 péchase o prazo de presentación de proxectos para acceder ós 12.000€ da Bolsa de Produción Fotográfica de
Revela. Proxectos de fotorreportaxe inéditos, que sirvan para
denunciar situacións de violencia, desigualdade, perigo ou dano
ecolóxico, marxinalidade ou calquera situación de inxustiza. O autor do proxecto seleccionado polo xurado disporá de 10 meses para a súa realización e, en torno á súa temática construirase a edición REVELA 07 do FORO INTERNACIONAL DE FOTOXORNALISMO E SOCIEDADE.