A Volta Ciclista a Galicia comeza o mércores 5 de xullo en Nigrán

A Volta Ciclista a Galicia chega á súa quinta edición contando coa participación da mellor representación do pelotón afeccionado español, entre os que se inclúe a presenza da práctica totalidade dos clubs galegos da categoría.

O director xeral para o Deporte, Santiago Domínguez Olveira, presentou esta edición que se considera especial por dous motivos esenciais: primeiro, por tocar as catro provincias da nosa Comunidade, iniciando o seu periplo en Nigrán o mércores 5 de xullo e concluíndo na localidade lucense de Viveiro o domingo día 9 de xuño.

Santiago Domínguez dixo que “a Volta Ciclista a Galicia entra dentro do programa de colaboración entre a Federación Galega de Ciclismo e a Dirección Xeral para o Deporte, e considerámola unha actuación estelar”. En relación á influencia da celebración en Galicia de dúas etapas da Vuelta Ciclista a España, o director xeral dixo que “non podiamos facer o esforzo de traer a Galicia dúas etapas da Vuelta, organizar a saída do ano 2007, poñer en marcha o Karpin Galicia e deixar de lado o deporte de base nun ano moi especial para o ciclismo galego”.

Manuel Martínez, presidente da Federación Galega, destacou que “esta é a quinta edición, e despois da segunda a Volta a Galicia vense considerando dentro da máxima categoría de elite sub 23 e agardamos, o próximo ano, poder subir un chanzo máis de xeito que poidan participar equipos continentais”.

O técnico da Federación Galega, Guillermo Sende, destacou o cambio de datas deste evento, que agora se disputa en xullo pero que tradicionalmente se viña celebrando en agosto, así como o seu itinerario, que este ano é un pouco máis longo. “É unha volta moi compensada entre dureza e quilometraxe, que é como pensamos que deben ser as voltas ciclistas. Posiblemente non se decida o gañador ata a última etapa”, afirmou.

Percorrido

Entre a saída de Nigrán e a meta de Viveiro, o pelotón disputa dúas etapas na provincia de Ourense, na capital o xoves e no Concello de Melón o venres. A xornada do sábado transcorre polas estradas coruñesas con saída e chegada na avenida central da capital herculina. O segundo aspecto destacado desta edición é o acicate, para moitos membros do grupo de afeccionados galegos, da inminente creación do equipo profesional “Karpin Galicia”, polo que esta proba, auténtico buque insignia da Federación, preséntase como o escaparate idóneo para que moitos deles demostren que están sobradamente preparados para dar o salto ao profesionalismo.

O cambio de datas que este ano sofre a gran rolda galega (habitualmente a cabalo entre os últimos días de agosto e os primeiros de setembro), débese á coincidencia destes días coa disputa en Galicia de dúas etapas da Vuelta a España. Os corredores dos dezasete equipos inscritos percorrerán un total de 694 quilómetros, sendo a etapa máis longa a de Ourense, con 160 e a máis curta a de Viveiro aínda que esta última, con final no alto de San Roque, cota puntuable de primeira categoría.

A nómina de favoritos é longa aínda que cabe agardar unha grande actuación dos galegos entre os que destacan, polos éxitos que foron logrando ao longo da tempada, homes como Juan Mourón (Hierros Diego), Magallanes e Sobrino (Froiz), Rabuñal (Cambre), Covelo (PSA), Borja Calviño (Spol) ou Delio Cruz (Caja Rural).

Entre os equipos chegados do resto de España así como de Portugal, é importante destacar a presenza do Soctec Construcciones, en cuxas filas se atopa o gañador da pasada edición da Volta, Manuel Jesús Jiménez, ou o Hierros Agüera co cubano Luis Ramos, gañador da última edición da Volta a Coruña.

A proba está organizada pola Federación Galega de Ciclismo e conta co patrocinio da Xunta de Galicia a través da Dirección Xeral para o Deporte e a Fundación Deporte Galego, así como coa colaboración das firmas Caixanova e Coca Cola xunto co apoio de cada un dos concellos polos que descorre a carreira.