O concello de Brión inviste máis de 53.000 euros na restauración de 30 lavadoiros, cinco fontes e dous muíños

Cun orzamento de 53.076 euros o Concello de Brión acomete actualmente a restauración e rehabilitación de varios lavadoiros, fontes e muíños esparcidos polo municipio. En total cabe falar de 30 lavadoiros, cinco fontes e dous muíños aos que se lles está a pasar revista. Facemos agora un repaso por oito deles, da man de Hipólito Berdullas, Xefe de Obras do Concello.

Na aldea de Boaventura, na parroquia de San Fins atopamos un lavadoiro de pedra, agora ao descuberto grazas á limpeza da vexetación que o recubría. A colocación dun novo piso evita a perda de auga. Doutra banda, en Guitiande- Os Ánxeles o lavadoiro da zona requiriu un novo tellado e unha limpeza completa. En Perrós (Os Ánxeles) o novo tellado acompañouse do pintado de todo o lavadoiro. En O Ribeiro (Bastavales), o lavadoiro foi liberado da maleza que o rodeaba e as gretas foron reparadas. En Bemil (Bastavales), o muro de pedra foi restaurado e no chan colocouse unha soleira de formigón. Este tipo de chan foi tamén colado no lavadoiro de Soigrexa (Bastavales) que recibiu ademais novo tellado. Finalmente, en Chave de Carballo (Bastavales) atopamos unha fonte en fase de rehabilitación, así como un muíño ao que se lle están a colocar novas pezas para lograr o seu funcionamento.

En Brión de Abaixo

Por petición dos veciños da zona, o Concello de Brión está a levar tamén a cabo unha serie de obras na aldea de Brión de Abaixo. Ditas obras consisten, por un lado na restauración do lavadoiro parroquial cunha reparación específica da súa pía, e por outro na ampliación de varios tramos de camiño e dos muros que os bordean. Os obreiros levan na zona desde o pasado luns. Segundo o Xefe de Obras do Concello, Hipólito Berdullas, “estas accións eran moi necesarias pois os rueiros afectados eran demasiado estreitos para o paso de camións, carretas, etc”.
As actuacións en Brión de Abaixo suporán demoler varios muros para reconstruílos despois con pedra cachote. Os tramos afectados presentan unha lonxitude aproximada de 25 metros x 1’5 de alto. O orzamento destinado a ampliación destes tramos ascende a 26.760,89 euros.