Pesca inviste este ano máis de 27 millóns de euros en axudas ás confrarías e ás súas federacións

A Conselleira de Pesca e Asuntos Marítimos, Carmen Gallego Calvar, informou aos membros do Goberno galego sobre as axudas outorgadas polo seu departamento ás confrarías de pescadores e ás súas federacións no referente a persoal laboral, formación e divulgación, funcionamento dos colectivos, proxectos
integrais, plans de porto e pesca costeira artesanal. As entidades colectivas accederon ás citadas axudas a través do sistema de concorrencia competitiva, e non por medio de convenios, como facía o anterior goberno. Para estas iniciativas a Consellería de Pesca e Asuntos Marítimos investiu un total de 27.102.778 euros.

Segundo o informe presentado aos membros do executivo autonómico, o
departamento de Pesca da Xunta de Galicia determinou xa, dende a súa
primeira comparecencia no Parlamento, cales ían ser os principios básicos
da súa actuación en relación co sector na procura de impulsar un avance
económico, social e participativo das traballadoras e traballadores do
mundo da pesca, o marisqueo e a acuicultura, marcado pola non exclusión de
ningunha entidade nin o favoritismo que se deu durante moitos anos. De tal
xeito, os principios de transparencia, de participación e implicación
motivaron que no actual orzamento e nas accións que leva a cabo Pesca, se
optara claramente por promover a concorrencia competitiva para acceder aos
recursos públicos que se destinan, sobre todo, a xerar novos proxectos,
inversións, planificacións do sector e que redundarán en beneficio de toda
a colectividade pesqueira galega.

A implantación deste novo sistema supón cambios nos criterios e na
orientación dos fondos públicos e tamén nas organizacións do sector que
teñen que mudar o seu esquema de funcionamento e a súa relación coa
administración, mediante a presentación de proxectos e accións concretas
sometidos a un réxime de avaliación.

Pesca considera que a concorrencia competitiva permite que todas as
organizacións, seguindo baremos obxectivos, teñen dereito a acceder ás
axudas. Deste xeito, as recentes críticas por parte dalgunhas confrarías e
federacións parecen obedecer á súa negativa cara este sistema igualitario e
democrático para con todos os organismos recoñecidos pola Lei de Pesca como
entidades de interese colectivo.

Axudas para persoal, formación e divulgación

Segundo amosa o informe presentado hoxe no Consello, a Consellería de Pesca
conta, na súa relación de postos de traballo, con 128 funcionarios que
teñen o seu destino en confrarías de pescadores de Galicia, colaborando
activamente cos órganos de goberno dos pósitos. Os gastos deste persoal son
asumidos, na súa totalidade, polo departamento que dirixe Carmen Gallego
cunha inversión total de 3.034.928 euros.

Dentro das acción formativas e divulgativas que leva a cabo Pesca inclúense
unha serie de cursos que se imparten a petición dos pósitos dirixidos aos
seus asociados na busca dunha mellora na súa formación. Para estas accións,
a Consellería investe máis de 899.000 para o ano 2006. Ademais, existen
cursos de formación en materia de riscos laborais e formación sanitaria
específica inicial demandados polas organizacións do sector e que imparte a
Federación Galega de Confrarías e para o cal Pesca destinou 50.000 euros. A
Consellería colabora tamén con 310.000 euros noutras accións de divulgación
realizadas polas confrarías.

Gastos de funcionamento

Con respecto á orde publicada no DOG por Pesca para axudas as entidades de
interese colectivo de ámbito provincial ou autonómico, por un importe de
417.000 euros, a Consellería informou que foron solicitadas polas tres
federacións provinciais de confrarías e pola Federación Galega. Asimesmo, o
departamento que dirixe Carmen Gallego destinou unha cantidade de 280.000
euros ao apoio dos sistemas de información contable das confrarías de
pescadores e das súas Federacións.

Proxectos integrais, plans de portos e pesca costeira artesanal

Tal e como consta no informe presentado a Consello, dentro da política de
axudas públicas que contribúen ao desenvolvemento económico de Galicia,
puxéronse en marcha unha serie de actuacións destacables como son os
proxectos de xestión integral, os plans de portos ou as axudas á pesca
costeira artesanal. Estas iniciativas foron acollidas moi positivamente
polo sector que presentou proxectos moi novidosos de explotación de
recursos mariños e de coñecemento e respecto do medio ambiente e que darán
resultados positivos nas vindeiras datas.

No que atinxe á xestión integral de proxectos colectivos pretendeuse que as
organizacións do sector presentasen iniciativas conxuntas para favorecer a
xestión con criterios empresariais do sector e a coordinación das accións
cunha optimización dos recursos públicos. Para esta actuación, no ano 2006
destinouse unha cantidade total de 5.091.784,34 euros.

Por outra banda, o informe inclúe os plans de portos cos que se pretende
dotar aos portos pesqueiros daquelas infraestruturas básicas para o
desenvolvemento da actividade pesqueira con mellores condicións de
seguridade, hixiene e modernidade. Neste caso a inversión de Pesca ascende
a máis de 13.483.000 euros.

No caso das axudas á Pesca Costeira Artesanal, que pretende apoiar aquelas
iniciativas das comunidades de pescadores adicados á pesca artesanal co fin
de dar máis valor engadido aos produtos da pesca, mellorar a
comercialización e aceptar os proxectos que incidan na mellora das
condicións e medios de traballo, pesca investiu unha cuantía de 3.537.066
euros.