Comezan as obras na parroquia de Viceso, en Brión

O equipo municipal de Obras atópase nestes días moi atarefado co inicio das obras de acondicionamento do entorno da Igrexa de Santa María de Viceso, na aldea de Esparís. Hipólito Berdullas, Xefe de Obras visitaba a zona. “O que se pretende sempre desde o Concello é mellorar a calidade de vida dos veciños. Por exemplo, aquí en Esparís pretendemos anchear este tramo duns 300 metros que da acceso á igrexa parroquial, para que xente e vehículos teñen un mellor tránsito. Ademais os obreiros adecentarán a zona, colocarán beirarrúas, asfaltarán, realizarán un peche do entorno mediante muros e instalarase, como non, o sistema completo de recollida de augas”. O presuposto para estas obras ascende a 22.902,66 euros e inclúe o asfaltado da carreira cara Rois que xa está rematado.

Xunto a esta actividade en Viceso, a Brigada Municipal de Obras continúa co proxecto de mellora e reparación dos lavadoiros. Desta vez tocalle o turno ao de Senín, Piñeiro, Souto e Adoufo, todos eles na parroquia de Os Ánxeles; e ao de San Salvador, Cruxido e Valiño en Bastavales. Das obras pasadas podemos ver con asombro como o Muíño de Chave de Carballo xa está en funcionamento. “Como podes ver a roda de pedra xa xira e a auga corre a un bo ritmo”, sinálanos Hipólito.
Como peche deste tour co Xefe de Obras brionense, facemos parada técnica en Brión de Abaixo. “¡Como cambian os tempos! Agora ao ver estes muros xa rematados acórdome de canto empecei eu, hai uns 25 anos, poñendo asfalto as primeiras estradas do municipio como o que máis”.




SAÚDOS,
GABINETE DE COMUNICACIÓN.