O presidente da Xunta anuncia que o Goberno asumirá a reparación das infraestruturas públicas danadas e habilitará axudas para os danos en vivendas e comercios afectados polos enchentes en Cee e comarca

O titular da Xunta, Emilio Pérez Touriño, anunciou na localidade coruñesa de Cee que a Xunta de Galicia porá en marcha con carácter inmediato unha liña de axudas encamiñada a paliar os danos ocasionados polos enchentes rexistrados recentemente neste municipio, así como nos veciños de Dumbría, Corcubión e Fisterra. O presidente da Xunta asumiu a reparación das infraestruturas públicas danadas, os danos en vivendas e os desperfectos causados en locais comerciais -naquelas partes que non cubran os seguros- a través da posta en marcha dunha liña de axudas.

O presidente da Xunta realizou este anuncio logo dunha xuntanza mantida no Salón de Actos do Concello de Cee con veciños afectados polas inundacións, á que tamén asistiu o alcalde da localidade, José Antonio Domínguez, e o Conselleiro de Presidencia, Administracións Públicas e Xustiza, José Luis Méndez Romeu. Tras destacar que o Consello da Xunta de onte coñeceu un primeiro informe de avaliación da situación, Touriño puxo de manifesto o obxectivo do Goberno galego de que se restableza a normalidade canto antes nos núcleos afectados.

Redeseñar a canalización

Paralelamente, o titular do Goberno galego anunciou a vontade de articular, desde Augas de Galicia, unha serie de accións que permitan “redeseñar e actuar sobre os actuais sistemas de canalizacións dos ríos en Cee” co obxectivo de que se poidan protexer mellor os leitos fluviais. Deste xeito, ao actuar sobre a canalización poderían evitarse ou reducirse situacións como as ocasionadas por mor das últimas precipitacións na zona, que segundo destacou Touriño, acadaron o pasado luns máis de 80 litros por metro cadrado durante cinco horas seguidas. Así, destacou que se está a levar a cabo ademais a limpeza das canles dos ríos e dos sistemas de canalización e abastecemento de auga.

O próximo luns, técnicos da Consellería de Presidencia, da Alcaldía de Cee e do Consorcio de Compensación de Seguros que engloba aos afectados reuniranse para facer unha avaliación exhaustiva da situación e poder compensar economicamente canto antes aos damnificados.

Neste sentido, o máximo mandatario autonómico anunciou que a Consellería de Innovación e Industria xa habilitou unha orde de axudas cunha contía inicial de 1 millón de euros para atender os danos nos comercios.

A Xunta mantén a colaboración con todas as alcaldías afectadas para poñer en marcha os dispositivos para atender as situacións complicadas que se poidan volver a producir nestas localidade e para comezar a reparación da infraestruturas danadas e rematar cos problemas de accesibilidade e mobilidade.

Na súa vista de hoxe, o presidente da Xunta visitou Dumbría, Cee e Corcubión e tivo ocasión ademais de coñecer de primeira man os danos, e de falar cos veciños que se viron afectados polos enchentes. Touriño trasladouse a pé á zona máis afectada de Cee e tamén coñeceu en Dumbría os danos orixinados nunha estrada comarcal que se viu seriamente afectada polas intensas precipitacións.