Os orzamentos da Vicepresidencia para o 2007 ascenden a 406 millóns de euros, case un 11% máis que o ano anterior

O orzamento total da Vicepresidencia para o ano 2007 ascende a 405.916.041 euros, o que se traduce nun incremento dun 10´94% en relación ao ano 2006 que contou cun presuposto de 365.874.290 euros. Destes 405.916.041, 107.391.231 corresponden ao capítulo de gastos de persoal e 298.524.810 ao de investimentos, segundo informou o vicepresidente da Xunta, Anxo Quintana.

O vicepresidente destacou que o capítulo correspondente a gastos de persoal increméntase un 8´88% en relación ao 2006. Esta partida dedicarase á contratación de equipos de valoración da dependencia, con motivo da entrada en vigor da Lei da dependencia. Ademais inclúe o investimento para a contratación de persoal da nova residencia pública de persoas maiores de Volta do Castro e o relativo á homologación da situación laboral dos profesionais que traballan no eido dos servizos sociais.

No que se refire aos investimentos, a maior parte do orzamento, un 70´63% vai ir destinado á área de xestión da dirección xeral de Acción Social, mentres que a secretaría xeral de Igualdade contará co 16% do orzamento da Vicepresidencia. Un 8'44% será xestionado pola secretaría xeral de Relacións Institucionais e finalmente, un 4´92% destinarase ás políticas de xuventude.

A maior partida, o 70´6% para Acción Social

O 70,6% do orzamento da Vicepresidencia para o 2007 dedicarase ás áreas de actuación da dirección xeral de Acción Social, dependente da secretaría xeral do Benestar. Este departamento conta cun presuposto 210.848.001 euros, un 9´49% máis que no 2006.

As actuacións que se van a levar a cabo nesta área céntranse, en primeiro lugar, na atención ás persoas maiores a á dependencia. Neste senso, unha parte importante destes orzamentos do 2007 destinaranse a incrementar o número de prazas nas residencias de titularidade pública, creando centros propios e establecendo liñas para o concerto de prazas. Ademais abriranse novos centros de día e crearase unha rede de centros especializados na atención ás persoas con alzheimer e outras demencias. Tamén se vai investir na creación da rede pública de transporte adaptado de Galiza e incrementarase a intensidade na axuda a domicilio e o apoio ás persoas coidadoras.

No que se refire a menores, vanse implantar o Rexistro Unificado de Maltrato Infantil, o programa de absentismo escolar e crearanse 4 unidades de acollida e valoración nas catro provincias galegas.

Na área de discapacidade, os orzamentos do 2007 contemplan partidas para a posta en marcha do Plan de Acción Galego para Persoas con Discapacidade, para o Programa Galego de Accesibilidade, así como para a creación da primeira unidade de emerxencia para a atención de persoas con discapacidade.

Finalmente, na área de Benestar, investirase na mellora da cobertura e das contías da Renda de Integración Social de Galiza, RISGA, na creación da rede de centros de emerxencia social e atención na rúa así como na implantación de 20 equipos de intervención para a inserción sociolaboral das persoas con maiores dificultades.

As políticas de Igualdade, as que máis medran

A Secretaría xeral de Igualdade conta para as súas áreas de actuación co 16% do orzamento total da Vicepresidencia, 47.776.789 euros, un 19´21% máis que no 2006. O presuposto destinado ás políticas de Igualdade é o que experimenta o maior incremento de toda a Vicepresidencia.

Na área de familia e infancia, investirase no desenvolvemento do Programa de Creación das Galescolas e no Plan de Calidade de Mellora Pedagóxica.

Na área de Promoción da Igualdade, as actuacións centraranse na elaboración do Plano Director de Corresponsabilidade no contorno empresarial galego e na liña de axudas para a redución da xornada laboral dos pais. A través do Servizo Galego de Igualdade, impulsaranse os programas EMEGA de fomento de autoemprego en mulleres e mellorarase e estenderase a Rede de Información ás Mulleres, os CIAM, CIMs e PIMs.

No que se refire ao tratamento da violencia de xénero, contémplase a continuidade do programa Salario da Liberdade- a día de hoxe xa se concederon 213 axudas- e a tramitación e desenvolvemento da Lei galega de Prevención e Tratamento Integral da Violencia de Xénero. Ademais, mellorarase a atención social integral, mediante a posta en marcha do Centro de Recuperación Integral, da mellora dos servizos nos centros de acollida e dos programas de atención psicolóxica e de reeducación dos agresores.

18,38%de incremento no orzamento da Secretaría Xeral

A secretaría xeral e de Relacións Institucionais investirá nas súas áreas de xestión, 25.202.758 euros, o que representa o 8´44% dos orzamento total da Vicepresidencia. Deste xeito, os orzamentos do 2007 increméntanse un 18´38% en relación aos do 2006.

Este orzamento vai destinado á posta en marcha do Plan Integral de Mellora das residencias de persoas maiores da rede pública da Xunta de Galicia, (PIM), á posta en marcha e difusión do Rexistro de Convenios e á implantación da Carta de Servizos Universal en todos os centros de servizos sociais da Xunta de Galicia.

O investimento na xuventude medra un 19%

A área de Xuventude disporá dun orzamento para o 2007 de 14.697.262 euros, un 10´53% máis que o destinado este ano a políticas para a mocidade. Ademais, nas partidas referidas ás obras, as dedicadas á xuventude medran un 25%. O investimento na área de xuventude representa o 5% do orzamento total da Vicepresidencia.

Os obxectivos que se perseguen con esta partida orzamentaria, na área da solidariedade, son a elaboración dun novo Plan Galego de Voluntariado, a continuidade na execución don programa “En defensa do Monte Galego” e a creación da figura do voluntariado lingüístico para promover o coñecemento e uso da lingua galega.

Ademais, na área de mocidade, está prevista a posta en marcha de novos centros Quérote de educación afetivo-sexual así como a mellora da rede de instalacións xuvenís e da Rede Galega de Información e Documentación Xuvenil.