Vicepresidencia colabora con Feafes-Galicia nun programa de actividades diarias e atención a domicilio no rural para persoas dependentes con trastorno mental

O vicepresidente da Xunta, Anxo Quintana, rubricou un convenio de colaboración entre a Vicepresidencia da Igualdade e do Benestar e a Federación de Asociacións de Familiares e Enfermos Mentais de Galiza (FEAFES-GALICIA) mediante o que se desenvolve un programa de fomento das actividades da vida diaria e da atención a domicilio no medio rural para persoas dependentes con trastorno mental grave.

En virtude deste convenio, a Vicepresidencia e o Ministerio de Traballo e Asuntos sociais cofinancian con 450.000 euros este programa, dentro das actuacións conxuntas entre ambas institucións previas á entrada en vigor da Lei de Promoción da Autonomía Persoal e Atención ás Persoas en Situación de Dependencia.

O obxectivo desta iniciativa é contribuír a que as persoas dependentes con trastorno mental grave acaden un maior grao de independencia para realizar as actividades básicas, instrumentalizadas e avanzadas da vida diaria, permitíndolles conseguir unha vida o máis autónoma e normalizada posible. Tamén se pretende facilitar que estas persoas poidan permanecer no seu entorno comunitario cunha calidade de vida digna, promovendo a súa inclusión social e formando ás familias sobre as características da súa enfermidade para mellorar a función terapéutica e coidadora que están desenvolvendo.

Por outra banda, quérese achegar a axuda e atención a aquelas persoas en situación de dependencia que por mor do illamento ou características especiais do seu lugar de residencia non poden acceder aos servizos de apoio comunitarios.

O programa derivado do convenio de colaboración implica, en primeiro lugar a realización dun estudio individualizado de cada caso. A partir disto, organízanse talleres de coidados persoais e de atención das necesidades do fogar, como cociña básica e limpeza doméstica. Tamén se fomentan as habilidades sociais, de ocio e tempo libre, e o coñecemento básico de formación e emprego para contribuír a unha maior e máis efectiva integración social.

Esta colaboración entre Vicepresidencia e FEAFES-GALICIA nace da loita por defender os dereitos e necesidades das persoas que sofren trastornos mentais, así coma dos seus familiares. Deste xeito, benefícianse do programa 150 persoas con discapacidade de toda Galiza, e podería chegar tamén a 280 coidadores informais ou familiares.

O que persigue FEAFES-GALICIA nas 14 asociacións coas que conta por toda a xeografía galega é que os seus máis de 4.000 membros con discapacidade acaden unha autonomía persoal e independencia maiores para conseguir que gocen dunha vida autónoma e normalizada. Neste senso traballa tamén a Vicepresidencia da Xunta, co obxectivo de acadar unha total integración social dos discapacitados que sufran un trastorno mental grave, obxecto para o cal se pon en marcha o programa de fomento das actividades da vida diaria e da atención social a domicilio no medio rural para estas persoas.