CC.OO. gaña as eleccións á xunta de persoal de funcionarios da Deputación de Pontevedra

Comisións Obreiras (CCOO) ven de gañar de novo as eleccións á xunta de persoal de funcionarios da Deputación de Pontevedra. Dos 15 delegados posibles, o sindicato logrou 12 (anteriormente contaba con 9), un "éxito histórico", segundo informan integrantes da candidatura de CCOO.

Ademais desta vitoria rotunda (é a terceira ocasión na que CCOO gaña por maioría absoluta), representantes do sindicato na Deputación salientan "o altísimo grao de participación", próximo do 90%, o que lle dá maior validez a este resultado.

Desde a candidatura de CCOO consideran que este éxito se explica polo traballo realizado nos últimos anos, pola práctica «dun modelo sindical eficiente e efectivo» que «deu respostas para as necesidades reais dos traballadores e traballadoras».