A debate a solución integral ao abastecemento presente e futuro de Ourense

A Consellería de Medio Ambiente, a Confederación Hidrográfica do Norte e o Concello de Ourense acometerán de xeito conxunto as actuacións necesarias para dar “unha solución definitiva e integral” as carencias de abastecemento que ten na actualidade a cidade das Burgas, pero sobre todo para garantir o subministro de auga que precisará nun futuro inmediato cos desenrolos urbanísticos previstos, aproveitando a consideración do abastecemento de Ourense como de interese xeral. Así o anunciaron o titular do departamento autonómico, Manuel Vázquez, e o alcalde de Ourense, Francisco Rodríguez, tras unha reunión que mantiveron en Santiago para analizar o estado de diversas actuacións medioambientais que se van acometer na cidade.

O alcalde de Ourense, Francisco Rodríguez, salientou a importancia do acordo para acometer un plan de abastecemento integral que garanta a cobertura das necesidades futuras da cidade, que non foron atendidas polo anterior goberno local nin recollidas no planeamento urbanístico que deixou aprobado.

Pola súa banda, o conselleiro de Medio Ambiente, resaltou a relevancia deste proxecto, que comparou co que actualmente se está acometendo na cidade de Lugo e que rolda os 34 millóns de euros de orzamento. O titular autonómico sinalou que a partir da próxima semana os técnicos das administracións implicadas comezarán a traballar neste “macroproxecto” de abastecemento da cidade de Ourense.

Á marxe deste asunto, outro dos temas que se tratou na xuntanza foi a execución do plan de saneamento da zona rural do municipio ourensán. O rexedor ourensán comprometeuse a que na vindeira semana se enviarán os primeiros proxectos para a súa execución, de tal xeito que o plan non rematará ata que se acade o obxectivo de sanear integralmente todo o concello de Ourense.

Centro de Interpretación dos Parques Naturais

No encontro entre o conselleiro e o alcalde tamén se abordou a creación do Centro de Interpretación dos Parques Naturais, que se ubicará na cidade de Ourense. O centro ocupará unha parcela cedida polo concello nas ribeiras do río Miño, que, cunha extensión de 40.000 metros cadrados, albergará un edificio de 3.000 m cadrados que se espera sexa visitado por unha media de 200.000 persoas ao ano, que é a media que recibe este tipo de centros no resto do Estado. Manuel Vázquez agradeceu ao Concello a súa implicación na “política medioambiental de Galicia” coa posta a disposición dos terreos para a creación deste Centro de Interpretación dos Parques Naturais, un espazo singular e simbólico que compilará toda a riqueza dos ecosistemas dos seis parques naturais.