Teima gaña o I Premio Solidario de Ferrol

Teima, unha entidade de Ferrol volcada dende hai anos na integración sociolaboral daquelas persoas con Síndrome de Down, resultou gañadora da primeira edición do Premio Solidario Cidade de Ferrol. O xurado do galardón, presidido polo alcalde, Vicente Irisarri, daba a coñecer esta mañá a decisión, tomada por unanimidade. “Acabo de comunicarllo á presidenta de Teima e en lugar da noraboa, dinlle as grazas en nome de toda a sociedade ferrolá”, sinalaba Vicente Irisarri. Aínda así, recoñeceu as dificultades do xurado á hora de elixir un proxecto entre os oito presentados en tempo e forma. A maioría, de asociacións da propia cidade. Deste xeito, Teima poderá desenvolver o programa presentado baixo o título “Emprego con apoio” coa dotación económica que corresponde ao galardón: 5.000 euros, que recibirá oficialmente o 31 de agosto, coincidindo co Día Mundial da Solidariedade.

Nesta liña, o alcalde explicaba que o Premio Solidario Cidade de Ferrol nace con vocación de continuidade no tempo, así como que o seu obxectivo principal é premiar os esforzos de iniciativas e proxectos desenvolvidos no marco da solidariedade, a cooperación e o voluntariado. En definitiva, “mostrar publicamente o recoñecemento da sociedade a ese exército de voluntarios, repartidos en asociacións e ONG´s que, día a día, nos dan unha lección de solidariedade e entrega aos demáis”.

Nesta primeira edición, a edil de Solidariedade, Beatriz Sestayo, destacou a calidade dos programas presentados, que foi enumerando un a un. Así, explicou que a Asociación SocioCultural de Minusválidos presentara un proxecto para promocionar a cultura entre este colectivo e, máis concretamente, para a posta en marcha dun taller de teatro. O Santo Hospital de Caridade achegou un programa para mellorar os servizos e condicións do refuxio para sin teito que hoxendía mantén aberto. O Centro Carmen Polo, un plan de mellora medioambiental no que implicaría aos alumnos e acondicionaría o entorno das instalacións. Afal Ferrolterra, un plan de mellora da atención aos enfermos de alzheimer. Solidariedade Internacional, un proxecto de cooperación en Bolivia. E Dios y Pan, un proxecto para facilitar o acceso de persoas sen recursos a alimentos.

O xurado do premio estivo presidido polo alcalde e composto por un representante de cada grupo político con representación no Concello: Beatriz Sestayo (PSOE), Javier Galán (IU), Rosa Martínez (PP), Juan Fernández (IF) e Elia Rico (BNG), así como dunha técnica do departamento municipal de Solidariedade, que actuou como secretaria, e de tres representantes do movemento asociativo -elixidos democraticamente entre as propias asociacións-. Foron estes últimos a asociación de veciños Fontelonga, Cogami e Gestión Social.

Respecto ao proxecto que financiará o Concello a través do Premio Solidario Cidade de Ferrol, Beatriz Sestayo explicou que pretende a integración das persoas adultas na sociedade a través do traballo, para o que se desenvolverán políticas preventivas e activas. Teima -que presentou xunto a este outro proxecto máis- parte da base de que as persoas con Síndrome de Down non se poden quedar ao marxe do mercado laboral e de que, do mesmo xeito que se considera a integración na escola ordinaria como unha medida máis eficaz e adecuada, tamén se considera a integración en empresas ordinarias como a vía máis eficaz para a consecución da normalización na vida cotiá das persoas adultas con Síndrome de Down.

Máis polo miúdo, os destinatarios do proxecto serán maiores de 16 anos e residentes en Ferrol e comarca, que desexen traballar en contornos laborais ordinarios. ¿As actividades planificadas? Nunha primeira fase de diagnose e avaliación estableceránse entrevistas para determinar as capacidades e o perfíl profesional do beneficiario. Nunha segunda fase realizaráse un estudo de mercado para implantar o programa de Emprego con Apoio (que dá nome ao proxecto). Este supón establecer colaboracións con empresas ordinarias e facilitar a incorporación dos usuarios. Ben coa contratación dende o primeiro día. Ben tras un periodo de formación previo. En ámbolos dous casos, se acompañará dun preparador laboral que lle facilitará ao traballador a súa adaptación ao posto para, máis adiante, irlle retirando os apoios programados. E, de seguido, entrar na fase de seguemento e valoración global do proceso. Paralelamente a esta, os usuarios e, tras rematar o seu horario laboral, deberán complementar a xornada laboral con diversos itinerarios formativos.