Inaugurado o I Curso de Verán de Antropoloxía

O vicepresidente da Deputación, o nacionalista Antón Bao, inaugurou, xunto con representantes da USC, no museo provincial a I Curso de Verán de Antropoloxía. A construción das identidades e a musealización das culturas populares. Este curso desenvolverase, en sesións de mañá e tarde, entre os días 7 e 11 de xullo. Os principais destinatarios do curso serán: guías e intérpretes de turismo, persoal de museos e estudantes de Humanidades, turismo, Socioloxía, psicoloxía, Filosofía e Ciencias da Educación.

O vicepresidente, Antón Bao, sinalou a necesidade da celebración deste tipo de cursos para que as persoas que teñen como responsabilidade ensinar, restaurar e conservar o noso patrimonio, coñezan en profundidade as súas características e peculiaridades “neste curso conflúen, claramente, dous dos obxectivos marcados polas áreas da Deputación, nas cales ten responsabilidades de goberno a forza política á que represento, que son a posta en valor e conservación do noso patrimonio histórico-artístico e a promoción turística. É moi importante desenvolver accións formativas dirixidas ás persoas que son e serán as encargadas de conservar e promocionar o valioso patrimonio histórico-artísitico galego”.

Antón Bao salientou que a cultura dun pobo se estuda e se analiza, entre outros, a través da antropoloxía, afondando na nosa identidade colectiva, na nosa identidade como pobo e como nación. Antón Bao referiuse, tamén, á importancia de transmitir a propios e visitantes a riqueza do noso patrimonio histórico-artísitico “Tan importante é a tarefa dos que, co voso traballo, recuperaredes e conservaredes pezas arquitectónicas como a laboura dos que transmitides á sociedade as singularidades e valores da nosa riqueza artística”.

13 CHARLAS E VISITAS GUIADAS Á REDE MUSEÍSTICA

Os asistentes a este curso ampliarán os seus coñecementos sobre a antropoloxía con trece charlas que se repartirán en xornadas de mañá e tarde entre o luns, día 7 e o venres, día 11. Ao longo destes días os participantes no curso poderán visitar os diferentes museos da rede museística provincial.