Primeira visita institucional do presidente da Xunta á Coruña onde se levan investido 70 millóns de euros

O presidente da Xunta, Alberto Núñez Feijóo, aseverou que “nos catro-cinco primeiros meses do Goberno, conseguimos un investimento no concello da Coruña superior a 70 millóns de euros entre a Terceira Rolda e o Plan Director do Hospital”. Así o subliñou o máximo mandatario autonómico, que esta mañá realizou unha visita institucional ao Concello da Coruña, durante a que tivo a oportunidade de manter xuntanzas cos voceiros dos grupos municipais e co propio alcalde.

Na súa comparecencia ante os medios, o presidente galego sinalou que tanto a Terceira Rolda como o Plan Director do Hospital da Coruña constitúen dous proxectos prioritarios para o Executivo que preside. Respecto da primeira infraestrutura, Feijóo lembrou que hai unha semana se adxudicou a terceira fase, por máis 30 millóns de euros. “Plantexeille ao alcalde que ese proxecto é prioritario para a Xunta de Galicia”, afirmou, explicando que tamén o é a fase que “está pendente exclusivamente de decidir o entronque da Terceira Rolda, no treito que está a facer a Xunta e o Ministerio de Fomento”. A este respecto indicou que “en canto o Concello e o Ministerio de Fomento decidan o lugar do entronque, a Xunta acometerá o proxecto necesario para a última fase da Terceira Rolda e finalizar así un novo acceso completo á cidade da Coruña”, un proxecto que definiu “clave” dado á configuración da urbe.

Na mesma liña, o presidente da Xunta lembrou que tamén asumiu o compromiso de reducir os prazos de execución deste treito da terceira rolda adxudicado recentemente. “Son uns prazos legais de 21 meses, pero imos tentar que no ano 2011, se é posible no primeiro semestre, estea finalizada a Terceira Rolda e se poida unir directamente desde Penamoa ata Pocomaco”, subliñou. Feijóo incidiu tamén en que sería “importante” ir diminuíndo todos os prazos de execución desta infraestrutura e avanzou que “a petición dos voceiros e do alcalde, imos asumir ese compromiso”.

Máis de 40 millóns de euros para o Plan Director do Hospital

“De igual xeito que na Coruña iniciamos a primeira obra importante de estradas, coa adxudicación da Terceira Rolda, tamén na Coruña iniciaremos a primeira grande obra de infraestruturas hospitalarias”, salientou o presidente da Xunta. A este respecto avanzou que despois do verán “licitaremos o resto (segunda fase) do Plan Director do Hospital da Coruña por un custe estimado de máis de 40 millóns de euros”. Segundo explicou, trátase dunha obra que neste momento está en supervisión de proxecto pero que espera ter licitada, incidiu, “despois do verán”.

O xefe do Executivo autonómico tamén destacou que se vén de adxudicar o novo centro de saúde en Mesoiro, que, dixo “completa o compromiso de facer ata 3 centros de saúde máis na zona da Coruña para dar servizo á atención primaria e, en definitiva, á necesidade de asistencia sanitaria”.

Tramitación do novo PXOM

Alberto Núñez Feijóo destacou, ademais, que a Xunta acaba de recibir a proposta do novo Plan Xeral de Ordenación Municipal (PXOM) da Coruña, unha iniciativa que valorou “positivamente”. Explicou que agora “o que temos é que ver se se axusta á lei, e se se axusta á lei, tramitar o deseño de cidade que o órgano competente, que é o Concello, presenta á Xunta”.

O titular da Xunta insistiu en que agarda que a tramitación se faga nun contexto de “diálogo e de lealdade mutua” e considerou fundamental que nestes momentos de recesión económica “se pare a pensar e reflexionar o que quere ser a cidade nos próximos anos para que cando volva outra vez reactivarse a economía teñamos o proxecto que quere executar e non improvisemos facendo un plan xeral mellorable”. Por iso, considerou fundamental “aproveitar a lamentable crise económica na que estamos para facer unha nova carta urbana da Coruña a través dun novo plan xeral de ordenación municipal”. Feijóo insistiu en que a Xunta o único que vai facer na súa tramitación “é ser fiel no cumprimento da lei, do urbanismo transparente, racional e sostible”.

Absoluta lealdade á vontade do concello da Coruña e os limítrofes

Durante o encontro co alcalde, o presidente galego tamén lle trasladou a máxima colaboración da Xunta de Galicia para que o Concello da Coruña e os concellos limítrofes “que previamente cheguen a consensos necesarios” poidan quedar plasmados “nunha lei de área metropolitana”. “Desde hai tempo, desde o ano 2004 que presentamos as Directrices de Ordenación do Territorio, incluíase unha área metropolitana de medio millón de habitantes na zona da Coruña e outra área metropolitana de outro medio millón de habitantes na zona de Vigo”, sinalou Feijóo aseverando que, neste caso concreto, será o alcalde da Coruña e os concellos da comarca “os que teñen que marcar os tempos”. “A Xunta de Galicia vai atender con absoluta lealdade os proxectos que veñan para facer unha área metropolitana, previamente os consensos municipais imprescindibles”, abondou.

Metro lixeiro e porto exterior

Outros dos asuntos abordados na visita institucional á cidade da Coruña foron o metro lixeiro e o porto exterior. Respecto ao primeiro, Alberto Núñez Feijóo avogou por “enfocar a planificación do metro lixeiro”, xa que, ao seu entender, as cidades dun volume de habitantes coma Coruña “necesitan unha infraestrutura de transporte urbano distinta e adicional ao transporte en autobús”. Un metro lixeiro que cualificou como un proxecto “ambicioso pero necesario”. E por iso, afirmou, “imos tentar pechar os percorridos do metro lixeiro e despois sentarnos co concello para buscar unha explotación que concite a posibilidade de investimento privado para explotar un metro lixeiro na Coruña como unha forma de comunicación importante e clave nesta cidade”.

Polo que respecta ao porto exterior, Feijóo remarcou que “a Xunta de Galicia sigue igual de comprometida que o primeiro día; a Xunta de Galicia sigue apoiando esta obra con absoluto compromiso político e con total e absoluto compromiso de seguridade marítima”. “O porto exterior non é da Coruña, o porto exterior é o compromiso de toda a fachada atlántica europea de facer un porto que por razóns de seguridade A Coruña o precisa”, engadiu subliñando que por iso a Xunta estará ao lado do concello para solucionar os problemas e os atrancos financeiros advertidos na execución da obra.

“O apoio do presidente da Xunta co porto exterior é un apoio que non ten volta atrás”, aseverou avanzando que a tal efecto lle pediu ao ministro de Fomento, na xuntanza que mantivo con el hai uns días, unha reunión “para buscar unha solución ao porto exterior” e na que estean presentes o presidente de Portos do Estado, o presidente da Autoridade Portuaria da Coruña, o Concello da Coruña e a Xunta de Galicia. “E eu espero, despois de agosto, iniciar eses contactos e esas reunións imprescindibles para buscar unha saída aos problemas e ás tensións financeiras que ten esa infraestrutura co obxectivo de que non teña volta atrás o porto e que o porto se faga porque é imprescindible para a seguridade marítima de Galicia, para a da Coruña e para toda a fachada atlántica europea”, concluíu.

Diálogo fluído e frutífero con carácter de permanencia

O titular da Xunta quixo aproveitar a súa visita á Coruña para felicitar in situ a todos os coruñeses por lograr a declaración da Torre de Hércules como Patrimonio da Humanidade, unha felicitación que fixo extensiva a Galicia enteira. “Espero que ese faro, que leva iluminando séculos esta cidade, siga iluminando nun futuro o progreso e a modernización da cidade da Coruña”, afirmou.

Por último, o presidente galego agradeceu “a receptividade” coa que foi recibido no Concello da Coruña, a penúltima parada da rolda polas sete cidades galegas, un compromiso para os 100 primeiros días de Goberno que completará en Vigo esta semana e que ten como obxectivo sentar as bases dun diálogo “fluído e frutífero e de que este diálogo fluído e frutífero teña carácter de permanencia”, aseverou.