Raquel Arias recibiu á tenente de alcalde de Cultura, Patrimonio e Ensino de Tarragona

A Delegada territorial da Xunta de Galicia en Lugo, Raquel Arias Rodríguez, acompañada do Xefe Territorial de Cultura e Turismo, Xosé Carlos Rodríguez Andina, recibiu a ROSA M. ROSSELL I RIGAU, Tenente de Alcalde-Coordinadora da Área de Cultura, Patrimonio e Ensino de Tarragona. Á recepción acudíu tamén o empresario lucense Wenceslao Lamas, que desde hai tempo ven traballando no fomento das relacións institucionais entre Tarragona e Lugo.

A Tenente de Alcalde visitou Lugo acompañada da arqueóloga do concello, para establecer vencellos con institucións lucenses e avanzar nas relacións que permitan chegar a irmandar ás dúas cidades, abogando pola colaboración das diversas institucións e o Ministerio de Cultura para potenciar a relación entre as dúas cidades pola súa común orixe romana.

Previamente a política catalana entrevistouse co Arquitecto director do Plan da Muralla de Lugo, Ignacio López de Rego Uriarte, co que intercambiou impresións sobre os procesos seguidos en Tarragona e Lugo para a protección das murallas romanas das dúas cidades.

Nesta primeira visita oficial a Lugo – que inluíu tamén entrevistas co Alcalde da cidade e o Bispo da Diocese – Rosa M. Rossell demostrou especial interese nos aspectos de patrimonio e restauración monumental, temas nos que o Concello de Tarragona se ten implicado decididamente, invitando ás autoridades lucenses a visitar a cidade en todo momento e de xeito especial nas celebracións relacionadas co seu pasado romano.

A Delegada Territorial da Xunta agasallou á política catalana cunha figura de Sargadelos, e esta entregoulle dúas publicacións editadas polo concello de Tarragona relativas á cidade e á súa Semana Santa.