As Deputacións de Lugo e Ourense estudan a creación do museo Manuel María

O vicepresidente da Deputación de Lugo, o nacionalista Antón Bao, xuntouse en Ourense co presidente da Deputación de Ourense, José Luís Baltar, para estudar a participación da Deputación de Ourense no proxecto de creación do museo sobre o poeta Manuel María na súa casa natal, un proxecto que promove a vicepresidencia da Deputación de Lugo desde a súa Área de Cultura. Antón Bao agradeceulle a José Luís Baltar a prontitude na resposta por parte da Deputación de Ourense e destacou a importancia da implicación de todas as institucións do pais para levar a cabo este proxecto. Pola súa banda o presidente da Deputación de Ourense manifestou a súa predisposición a participar no proxecto e colaborar na creación dunha sede digna para a Fundación Manuel María. Baltar felicitou ao vicepresidente da Deputación de Lugo “por esta interesante iniciativa posto que Manuel María é un dos bos e xenerosos deste pais e a súa memoria non debe de ser esquecida”.

Tal e como explicou o vicepresidente da Deputación de Lugo, Antón Bao, esta é a segunda xuntanza, logo de entrevistarse hai un par de semanas co seu homólogo coruñés, da rolda de contactos que se están a manter para lograr facer da casa de Manuel María un centro cultural para todo Galiza. Antón Bao remarcou que pola “transcendencia desta iniciativa en todo o ámbito do País, perséguese a implicación de todas as institucións que teñen competencias en materia cultural e daqueloutras que tiveron relación directa coa vida do poeta”. Neste camiño, Bao explicou que se pretende un achegamento para ver posíbeis puntos de colaboración entre as administracións galegas con responsabilidade en materia cultural (as Deputacións e a Consellaría de Cultura e Turismo), e aquelas institucións que tiveron relación directa e persoal con Manuel María, como é, por suposto, o Concello de Outeiro de Rei, o Concello de Monforte de Lemos, o Concello da Coruña e o Concello de Lugo. Antón Bao manifestou que o proxecto aínda se atopa nunha etapa incipiente pero que co liderado da Deputación de Lugo e o apoio doutras administracións poderase materializar e facer da casa natal do poeta Manuel María un centro cultural museístico para que os galegos e as galegas se acheguen á vida e obra do escritor chairego.

O nacionalista Antón Bao lembrou que a idea do proxecto de creación dun museo na casa natal de Manuel María xurdiu ao recoller a proposta feita desde a Fundación Manuel María. Bao, a este respecto, explicou que existe un claro “compromiso da Área de Cultura da Deputación por manter o legado e a memoria do poeta Manuel María e, de xeito máis específico e inmediato, dispoñer dese espazo físico onde se dea acollida á biblioteca, manuscritos, obxectos persoais e calquera outro feito que garde relación co poeta, de xeito que sirva, ademais, como lugar de referencia para dar a coñecer a súa figura e a súa obra ao pobo galego”.