A USC expón no Colexio de Fonseca gravados da obra de Rubens de catro séculos

Rubens, un dos pintores barrocos máis significativos da escola flamenca, creou un importante obradoiro formado cos mellores pintores da época seguindo a tradición iniciada no XV por artistas como Durero de realizaren ilustracións con distintas técnicas para diminuír o custe e ampliar o número de compradores. Para a súa realización precisábase a colaboración de profesionais especializados como debuxantes, gravadores, estampadores ou editores.

Con este fin rodeouse Rubens dos máis recoñecidos gravadores do momento, como Lucas Emil Vorstemn, Pontius, Cornelio Danckerts, Theodor van Thulden ou Cornelio Galle. Ademais, logo da súa morte houbo moitos proxectos de reprodución artística da súa obra entre os que destacan a serie de gravados que reproduce o ciclo de pinturas de María de Medicis ou o ‘Hércules e Onfale’, reproducida polo académico español Juan Antonio Camacho e que foi editada pola Real Academia de San Fernando.

Estes e outros gravados da obra de Rubens datados entre o século XVII e principios do XX, nun total de 40, exporanse a partir deste xoves no Colexio de Fonseca da USC. As obras exhibidas permiten a observación non só dos distintos xéneros practicados polo obradoiro, coma paisaxes ou retratos, temas mitolóxicos ou históricos..., senón das fieis características das composicións, o tratamento efectista da luz ou as naturezas exuberantes deste gran mestre.