O Plan Hurbe inviste 2,5 millóns de euros en concellos das catro provincias galegas

O conselleiro de Medio Ambiente, Territorio e Infraestruturas, Agustín Hernández, firmou en Santiago seis convenios de colaboración con outros tantos concellos galegos, que implican unha inversión de case 2,5 millóns de euros en actuacións incluídas no Plan HURBE. As obras recollidas nestes acordos beneficiarán aos máis de 30.500 habitantes dos municipios da Cañiza, Bande, Carral, Xinzo de Limia, Pantón e Antas de Ulla, pertencentes as catro provincias galegas.

Estas accións forman parte do Plan HURBE, actuación que busca un programa de mellora da calidade dos espazos urbanos. O Plan HURBE significa ordenar e priorizar os equipamentos e dar un contido corporativo a todo o mobiliario urbano, adecentamento os espazos públicos para buscar unha maior calidade de vida.

Reurbanización de prazas e rúas en Xinzo

En virtude do convenio de colaboración entre a Consellería e o concello ourensán de Xinzo de Limia executaranse as obras de acondicionamento e recuperación do espazo central do grupo de vivendas Santa Mariña, para poñelo en valor como espazo de convivencia dos veciños e, á vez, modernizar as instalacións dos servizos urbanísticos. Executaranse obras de urbanización na rúa Marcelo Macías, no centro urbano de Xinzo de Lima. Este vial constitúe unha importante vía de comunicación na que se sitúa o colexio Sergio Mascareñas con 700 escolares.

A Xunta de Galicia realiza unha achega económica de máis de 527.000 euros, dividida en dúas anualidades. O acondicionamento beneficia a máis de 10.000 habitantes do municipio ourensán de Xinzo.

Neste momento, o estado de conservación desta zona aconsella a realización de obras de reurbanización que a poñan en valor, para uso e espallamento dos veciños e para dotalas de áreas diferenciadas para peóns e tráfico rodado. Deste xeito, créase na praza un percorrido de uso peonil e con mobiliario urbano que invita a actividades de ocio e espallamento, e unha zona central que resolva o uso de aparcadoiros de vehículos.

Proxéctase tamén unha zona de axardinamento e levarase a cabo unha instalación de iluminación pública, instalarase a canalización para as redes de iluminación doméstica no futuro, colocaranse papeleiras fixas, bancos e unha pérgola de madeira con ancoraxes metálicas. A outra actuación correspóndese coa urbanización da rúa Marcelo Macías, xa que este viario presenta beirarrúas moi estreitas, con largos inferiores a un metro, en malas condicións e cunha iluminación deficiente. Pola súa banda, as canalizacións de abastecemento e saneamento precisan unha mellora para adecualas ao crecemento desta zona.

Renovaranse as acometidas domiciliarias de auga e saneamento afectadas polo cambio de tubaxes e realizarase o tendido das tubaxes en redes separativas para o saneamento; e a distribución de auga potable para cada beirarrúa. Por último, colocaranse sumidoiros para pluviais na calzada e dotarase de bocas de rega que satisfagan as necesidades da zona.

Eficiencia enerxética en Bande

No municipio ourensán de Bande, o departamento de Medio Ambiente investirá case 300.000 euros na execución da urbanización e instalación de luz pública de alta eficiencia enerxética no parque do municipio. As accións centraranse na demolición de 1.696 m2 de firme e escavación de gabia en terreos semiduros con utilización de medios mecánicos. Tamén se colocará tubo corrugado para a luz pública e instalarase cableado de dobre nivel. O proxecto contempla a instalación de seis columnas de iluminación coas correspondentes luminarias dotadas de equipamento de baixo consumo.

A Xunta de Galicia levará a cabo estas obras co fin de mellorar o contorno obxecto da actuación e a seguridade dos usuarios do parque, cumprindo a normativa sectorial das instalacións afectadas.

Accións no camiño Vello de Vilane en Antas de Ulla

No concello lucense de Antas de Ulla, investiranse case 400.000 euros para mellorar o estado de conservación da rúa Seoane e dotar de servizos o Camiño Vello do núcleo de Vilane. O obxectivo desta actuación consiste en mellorar a calidade dos espazos urbanos, solucionando problemas de infraestruturas urbanística, ademais de contribuír á súa conservación. Con isto, conseguirase mellorar a calidade de vida dos veciños do municipio e fomentar o seu desenvolvemento económico e social.

Os traballos que financia a Consellería de Medio Ambiente implicarán a instalación dun pavimento adecuado, luz pública axeitada, así como elementos de mobiliario urbano que acondicionen o contorno do municipio. Ademais, levarase a cabo a posta a punto dunha rede de saneamento no núcleo rural.

A colocación de pavimentación na rúa Seoane será semellante á existente na zona. Para a implantación da luz pública será preciso executar unha canalización, un cableado e elementos de rexistro de mando. Os soportes do cableado serán de catro ou sete metros de altura e a luminaria estará fabricada en fundición de aluminio. Por outra parte, a instalación da rede de saneamento será subterránea mediante tubos de PVC. Os pozos de recollida serán de formigón e ladrillo e terán un metro de diámetro e 1,5 metros de altura.

Urbanización do campo da feira en Carral

O convenio co concello coruñés ten por obxecto o proxecto de urbanización do Campo da Feira. As obras consistirán na adecuación de 1.526 metros cadrados de superficie nos que se sitúa actualmente o Campo da Feira, pavimentando tres espazos diferenciados; unha zona de circulación viaria que ocupará 581,56 metros cadrados, outra zona de beirarrúas de 811,84 m2 e outra destinada ao lecer, con 132,60 m2 de extensión.

Primeiro, será preciso o movemento de terras e a habilitación de gabias para aloxar as instalacións ademais da execución das cimentacións necesarias. Posteriormente, procederase á instalación de adoquíns e lousas para as zonas de beirarrúas e circulación viaria respectivamente. Na zona de lecer crearase un espazo axardinado. Por último, complétase a actuación coa implantación das redes de servizos, iluminación pública e colocación de elementos de mobiliario urbano.

Medio Ambiente investirá case 400.000 euros nesta actuación distribuídos en dúas anualidades. Cómpre dicir que os máis de 5.700 veciños de Carral se beneficiarán do proxecto de urbanismo do Campo da Feira.

Mosteiro das Bernardas en Pantón

A Consellería de Medio Ambiente tamén reservou un investimento de case 500.000 euros para a segunda fase da intervención no contorno do Mosteiro Cisterciense das Bernardas, declarado como Ben de Interese Cultural no Concello de Pantón. Estas obras levaranse a cabo grazas a un convenio de colaboración e cooperación técnica e económica entre a Xunta de Galicia e o concello lucense, que permitirá acometer e incorporar ao patrimonio público municipal estas obras.

Ferreira, lugar onde se atopa o singular edificio, sitúase próximo á Ribeira Sacra e a medio camiño entre Ourense e Monforte de Lemos, o que lle confire unha posición estratéxica para os efectos de potenciar o seu atractivo turístico, baseado na riqueza patrimonial do conxunto do concello de Pantón. Ademais, o deste mosteiro das Bernardas é un monumento que representa un auténtico foco de atracción para os visitantes que buscan as rutas de contido cultural e de coñecemento do noso patrimonio arquitectónico e paisaxístico.

Por todo isto, propúxose levar a cabo unha actuación para poñer en valor o contorno inmediato do mosteiro no teito comprendido entre a ponte do río Ferreira e o lugar do Curro.

Mellora urbanística na Cañiza

O departamento que dirixe Agustín Hernández levará a cabo un investimento neste concello pontevedrés de máis de 200.000 euros. As obras que se van realizar levaranse a cabo en varias rúas deste municipio e irán encamiñadas á mellora dos servizos eléctricos, da luz pública e á reposición de beirarrúas. Concretamente, actuarase en once rúas do centro urbano da vila. A finalidade última será a mellora da calidade de vida dos habitantes da Cañiza.

Levarase a cabo a mellora dos servizos eléctricos, onde se procederá á retirada do cableado en tendido aéreo, que supón un perigo para os viandantes e os condutores, substituirase por tendido subterráneo. A luz pública será outra das melloras necesarias para adecuar o contorno urbano ás necesidades dos habitantes do concello. Esta actuación levarase a cabo, ademais de nas rúas citadas anteriormente, nas rúas Antonio Facorro e do Amieiro, travesía do Mercado e no camiño de Augas Férreas -o cal non dispón de ningún tipo de iluminación-.

Finalmente, reporanse das beirarrúas das rúas Rosalía de Castro, Castelao, Otero Pedrayo, Pogreso e Curros Enríquez. Tamén serán acondicionados os pasos de peóns para permitir o acceso aos minusválidos. Isto completarase con novas sinalizacións que ofrezan maior seguridade aos viandantes e aos condutores.

Plan HURBE

A Consellería de Medio Ambiente puxo en marcha o Plan HURBE cuxos obxectivos son fomentar a recuperación dos espazos de encontro para mellorar a opción de lecer dos cidadáns e contribuír ao reequilibrio territorial fixando poboación no medio rural. A Consellería inviste preto de 100 millóns de euros para realizar 53 actuacións en algo máis de 40 concellos galegos,

Co Plan HURBE investiranse 34 millóns de euros para o programa de equipamentos públicos, 27,5 millóns de euros para a humanización de rúas, e 34 millóns de euros en programas de urbanización e mellora de espazos públicos.