O Barco Muralla de Lugo e un campamento do Km@ complementan a programación do Arde Lucus

O Presidente da Deputación de Lugo, José Ramón Gómez Besteiro, e o Alcalde de Lugo, José López Orozco, presentan as iniciativas da Deputación que complementarán a programación do Arde Lucus. Deste xeito, os miles de visitantes que se acheguen ata Lugo esta fin de semana poderán visitar a aula-barco Muralla de Lugo, recén estreada na Mariña e apadriñada polo Secretario de Estado do Ministerio de Política Territorial, Gustavo Zarrías. A embarcación, dotada de novas tecnoloxías pero tamén de aparellos pesqueiros da Mariña, pon en valor a costa lucense, a promoción económica medioambiental da provincia, e o Monumento Bimilenario por excelencia.

Na Praza do Seminario, ó carón do barco, tamén se asentará este domingo o campamento eco-tecno-lóxico; no que o organismo provincial dará a coñecer o Km@ Deputación de Lugo que, enmarcado no programa InnovaTE, promociona a administración electrónica.

Moeda oficial do Arde Lucus

Co motivo da celebración da festa romana, integrantes da Asociación Cohors III Lucensium entregáronlle este xoves ó Presidente da Deputación as moedas do Arde Lucus. Trátase da primeira entidade que crea unha iniciativa semellante, e que, segundo eles, deben ter todos os representantes das institucións luguesas. Esta asociación creada en 2007 foi medrando ano tras ano e, na actualidade, conta con 60 asociados da provincia e doutros puntos de Galicia como Santiago de Compostela.

A Cohors III Lucensium, vén organizando en cada edición unha serie de actividades culturais. Este ano, co obxectivo de seguir innovando, realizaron a primeira acuñación de Moneda Oficial ARDE LUCUS MMX. Está realizada en bronce, no anverso figura a cara de Augustu e reza o seguinte: CAESAR AVGVSTVS DIVI F PATER PATRIAE. (César Augusto Diviño Pai da Patria).

A moeda repartiuse polos establecementos e ten un valor de dous euros. O obxectivo da iniciativa é que os asistentes se sintan máis identificados coa cidade, facendo que público e comerciantes se metan no papel da festa, exportando unha imaxe positiva e cordial das xentes de Lucus Augusti.