Presentadas as Escolas de Predeporte e Prebasket do CB Estudiantes-Fundación Balogal

O vicepresidente da Deputación de Lugo, o nacionalista Antón Bao, presentou na sala de predeporte do Pazo dos Deportes de Lugo o inicio da tempada das escolas de predeporte e prebasket que pon en marcha a Área de Deportes da Deputación baixo a organización do CB Estudiantes - Fundación Balogal. Na rolda de prensa de presentación das actividades, acompañando a Antón Bao, estiveron Cristino Menor, vicepresidente deportivo do CB Breogán e director deportivo do Club Estudiantes - Fundación Balogal, e Alex Polo, coordinador das escolas provinciais de predeporte e prebasket.

Na súa intervención, Antón Bao destacou que “estas actividades permite atraer aos nenos e nenas de máis curta idade cara a práctica do deporte, ademais de socializar con outros da súa idade”. Para Antón Bao, desde a Área de Deportes da Deputación marcouse un traballo a seguir, compartido coa Fundación Balogal, “de continuar promovendo que teñan posibilidade de actividades distintas e facilitar a todos os nenos e nenas o acceso ao deporte e ao baloncesto como un elemento tamén fundamental de formación, saúde e alternativas”.

Pola súa banda, Cristino Menor, indicou que este ano seguramente se incrementará moito o número de nenos e nenas que participen nestas actividades xa que este verán, estas mesmas actividades que se desenvolveron nas chamadas Mañás provinciais – Móvete con nós, foron un completo éxito. De feito, Cristino Menor resaltou que incluso houbo xa demanda por parte de moitos dos pais e nais dos cativos que participaron nas actividades de verán, polo que de seguro que repetirán durante o curso.