Presentouse en Lugo a exposición dos Fondos do Museo do Prado

O nacionalista Antón Bao, vicepresidente da Deputación, e a directora do Museo de Lugo, Aurelia Balseiro, e María Quiroga, comisaria da exposición, presentaron a mostra que expón os depósitos do Museo do Prado que se atopan no Museo Provincial de Lugo e que poderá verse desde mañá até o 13 de febreiro. O depósito actual do Museo do Prado en Lugo está composto por vinte e oito pinturas desde o século XVI ao XIX e dúas esculturas do XIX, que se reúnen, por primeira vez, nesta exposición que se inaugurará mañá. Xunto ás obras que compoñen o depósito efectuado polo Museo do Prado directamente en 1940 expóñense tamén outras que foron depositadas nos anos trinta polo antigo “Museo Nacional de Arte Moderna”.

A exposición articúlase en torno a tres bloques coincidentes co catálogo do Museo do Prado. No primeiro reuníronse as obras pertencentes á Colección Real, que son parte dunhas obras acumuladas polos reis de España e que Fernando VII expón publicamente por primeira vez no 1819. Despois da morte deste monarca, o temor a unha división das coleccións entre as dúas herdeiras, -Isabel II e Luísa Fernanda-, fará que a colección se adscriba á Coroa en 1865 e que tres anos máis tarde se decrete a súa propiedade estatal, pasando a denominarse “Museo Nacional” en vez de “Museo Real”. Nun segundo bloque están as obras que se inclúen no inventario de Novas Adquisicións, que recolle as doazóns, legados e adquisicións feitas polo Museo do Prado. Por último, o terceiro apartado esta destinado a expor as obras procedentes do antigo “Museo Nacional de Arte Moderna”.