Concellos, Xunta e Asociación de Amigos do Ferrocarril organizan na comarca unha exposición para conmemorar o centenario da liña ferroviaria Ferrol-Betanzos en 2013

Fene e Paderne disculparon a súa ausencia delegando o seu voto. Uns actos que contan tamén coa colaboración da Asociación Ferrolterra Amigos do Ferrocarril, presente na xuntanza desta mañá, e a quen a edil agradeceu o traballo desinteresado que está a realizar. O programa contempla exposicións de material fotográfico, filatélico e histórico, ciclos de conferencias e mesas redondas sobre o ferrocarril, viaxes promocionais en colaboración con RENFE ou ciclos de cine con temática sobre o ferrocarril.

Nesta liña, a edil lembrou que o Concello de Ferrol preside a comisión organizadora dos actos de centenario, da que forman parte os concellos polos que discurre esta liña de ferrocarril e a Asociación Ferrolterra Amigos do Ferrocarril. Así, e segundo explicou, na xuntanza se abordaron, entre outros asuntos, o orzamento que se destinará ás placas conmemorativas que se outorgarán en todos os eventos que se organicen co gallo desta conmemoración, ou a necesidade de xestionar con diferentes administracións subvencións e colaboracións para poder levar a cabo as iniciativas previstas. Unha delas é a exposición que do 1 ao 15 de febreiro se poderá ver no Pazo da Cultura de Narón -anteriormente estivo aberta ao público no Centro Cultural Carvalho Calero- e, no mes de marzo, en Fene. A dita mostra, que percorrerá os diferentes concellos implicados nesta conmemoración, está composta por fotografías antigas e modernas do ferrocarril Ferrol-Betanzos, maquetas, ferramentas antigas, material de oficina (cuños, o reloxo da estación antiga de Ferrol...), e todo tipo de documentación relacionada co ferrocarril.

Os Concellos de Ferrol, Betanzos, Paderne, Miño, Pontedeume, Cabanas, Mugardos, Fene e Neda están a traballar desde hai meses xunto coa Asociación Ferrolterra Amigos do Ferrocarril e a Xunta nesta programación, que contempla así mesmo unha serie de conferencias que serán impartidas nos diferentes municipios por diferentes expertos ata o ano 2013. Entre estes, Xaime Barreiro Gil, director xerente da Fundación dos Ferrocarrís Españoles; María Xosé Porteiro, directora do Museo do Ferrocarril Madrid-Delicias; Luis Blanco Gómez, presidente da Fundación dos Ferrocarrís de Galicia; José Luis López Sangil, decano do Colexio de Enxeñeiros Industriais da Coruña ou Miguel Rodríguez Bugarín; director xeral de Mobilidade.

A estas charlas engadiranse novos actos, entre os que figura unha viaxe nunha locomotora de vapor micado do ano 1928 desde Betanzos a Ferrol, prevista para o 5 de maio de 2013, coincidindo co aniversario. Un ferrocarril histórico que foi restaurado e forma parte do Museo do Ferrocarril de Galicia, ubicado en Monforte. Unha grande exposición na Feira de Mostras poría fin ao calendario de actividades, que se irán perfilando en sucesivas reunións de traballo como a mantida onte no Concello de Ferrol.