O vicepresidente da Deputación Provincial de Lugo anuncia unha liña de axudas directas aos pilotos en competición

O vicepresidente da Deputación, o nacionalista Antón Bao, anunciou que os pilotos de rally lucenses contarán cunha liña de axuda para sufragar os gastos derivados da competición, mediante un tipo de subvencións que porá en marcha a Área de Deportes da Deputación de Lugo. Esta declaración tivo lugar no transcurso da II Xuntanza do Automobilismo Lucense, que organiza a Escudería Miño coa colaboración da Área de Deportes da Deputación de Lugo, e que serve de gran xuntanza de presentación dos equipos e escuderías lucenses de rally.

Antón Bao anunciou na súa intervención diante dos afeccionados ao motor lucense que a Área de Deportes da Deputación convocará unha liña de axudas para colaborar directamente cos pilotos de rally e así contribuír no mantemento dos custes derivados da competición. En concreto, Antón Bao falou dunha liña de subvencións que irán no camiño de sufragar a adquisición de neumáticos de competición para os pilotos lucenses, o que permitirá tamén que se incremente a seguridade na competición. O vicepresidente da Deputación explicou que a idea de estabelecer esta posibilidade de axudas directas xurdiu das conversas de traballo cos pilotos lucenses e coa propia Escudería Miño, no que tivo un lugar destacado o piloto Avelino Basanta como exemplo de superación ao afrontar a competición de rallys baixo o prisma da discapacidade, e que aconsellaron esta medida para favorecer a participación dos pilotos lucenses nas distintas probas de ámbito galego e estatal.

Bao tamén tivo palabras de agradecemento para toda a xente que participou na II Xuntanza do Automobilismo Lucense, desde as persoas que colaboraron na organización, os centos de afeccionados e afeccionadas que encheron os arredores do Pazo dos Deportes para vibrar coa exhibición dos pilotos, pasando polos propios pilotos participantes e todo o mundo do motor lucense, e rematou a súa intervención desexando “a todos e todas os maiores éxitos de cara a tempada que comeza, dicirvos que levedes con orgullo o nome de Lugo por todas as estradas de Galiza e España, e que sempre contaredes co respaldo necesario por parte da Deputación de Lugo”.