Preséntase na Deputación Provincial de Lugo a Feira das Asociacións Socioculturais

Presentouse na Deputación de Lugo a Feira de Asociacións Socioculturais que se celebrará os días 8, 9 e 10 de abril na Praza da Soidade. A Área de Cultura colabora coa organización desta feira, en cuxo acto de presentación estiveron presentes Antón Bao, vicepresidente da Deputación, así como Clara Raposo, da Cova da Terra, Gerardo Castedo de Taller de Solidariedad e Reiki Lugo, Quiteria Mejuto, de Implicadas no Desenvolvemento e Nélida Castiñeira, de Asorlu. A celebración deste evento pretende dar a coñecer as actividades que desenvolven estas organizacións lucenses, así como buscar voluntariado na cidade.

Como explicou Antón Bao, “estas 25 asociacións traballan en diversos ámbitos da vida social e cultural e representan o corpo do tecido asociativo lucense, que as administracións debemos ter presente para darlles o noso apoio”. A Área de Cultura “apoia decididamente esta iniciativa, para que estas organizacións poidan mostrar aos lucenses ese traballo impagable que están realizando nos ámbitos da ecoloxía, da discapacidade, da inmigración ou da cooperación internacional, entre outros”. Manifestou a súa seguridade de que “a feira vai ser un éxito, e vai servir ademais como mostra dun valor importante como é o respecto á pluralidade, unha riqueza que debe estar presente sempre nas actividades que se desenvolven na cidade”.